Almanya rîyê ciewnîyayîşê serraneyî yê Xeta 1. ya Herikîyayîşê Vakurî ra qerqilîyena. A eşkena bi temamî bêgazî bimana.

Roja dişemeyî ra nata Xeta 1. ya Herikîyayîşê Vakurî de karê ciewnîyayîşî dewam keno. Coka Almanya xo amade kena ke dişemeyî ra nata herikîyayîşê gazî yê Rûsya bi rengêkê mendeyî vindero.

Xeta 1. her serre bi sîstematîkî kontrol bena. Seba nê zî herikîyayîşê gazî 10-14 rojan yeno birnayene. La Almanya qerqilîyena ke emser gaz bi temamî bêro birnayene.

Wezîrê Ekonomî yê Almanya Robert Habeckî derheqê babete de Deutschlandfunkî rê qisey kerd û vat: “Beno ke her çi bibo. Beno ke gaz newe ra bêro, beno ke sey verî nêro yan zî beno ke tewr nêro.”

Çarçewa nê de Almanya de planê rewşa lezabeze yenê amadekerdene. Dima ke şerê Rûsya-Ukrayna dest pêkerd Almanya de zî şuxilîyayîşê gazê xozayî yê herikîyayeyî (LNG) dest pêkerd.

Roja îneyî zî Almanya de qanûno ke destûr dano newe ra aktîfkerdişê santralanê komirî ame qebulkerdene.