Birayê Abdullah Ocalanî Mehmet Ocalanî vat ke goreyê qanûnanê Tirkîya heme tepişteyî û hukmwerdeyî eşkenê pêvînayîş bikerê û wina qisey kerd: “La Îmrali de heq û huqûq yeno binpaykerdene. “

Tecrîdê serê Rayberê Şarê Kurdî Abdullah Ocalanî çend şino xorî beno. Rixmê spekulasyonanê sey ”pêvînayîş do bêro kerdene” roşan de zî berê Îmraliyî anêbîyî. Birayê Abdullah Ocalanî Mehmet Ocalanî yo ke tewr peynî de 25ê adara 2021î de bi telefonî birayê xo dir pêvînayîş kerd, ANFyî rê qisey kerd.

Mehmet Ocalanî vist vîrî ke yew serre zafêr o birayê xo ra xebere nêgenê û vat: “Muracatê ma û avûkatan bi bahaneyê cezaya dîsîplînî yenê redkerdene. Goreyê qanûnanê Tirkîya heme tepişteyî, hukmwerdeyî eşkenê pêvînayîş bikerê. Her kes eşkeno merdiman û avûkatanê xo bivîno la Îmrali de heq, huqûq yeno binpaykerdene. Na bêhuqûqîye teyna birayê mi rê nê vera Omer Hayrî Konar, Hamîlî Yildirim û Veysî Aktaşî zî yena kerdene. Nê çar kesî bi serran o ne merdiman ne avûkatanê xo vînenê. Goreyê qanûnê Tirkîya çîyo winayên nîno qebûlkerdene.

Hinî Abdulkadir Selvi çi nuşto çi nênuşto xeymê mi de nîyo. Ê xo mîyan de muneqeşe kenê la qiseykerdişo veng o. Ez eşkera vajî na dewlete û nê huqûqî ra yew pawitişê mi çîn o.  Ma sey keyeyî 3ê adara 2020î ra pêvînayîş nêkenê. Tewr peynî de mi hendê 5 deqayan ey de qisey kerd. Na rewşe hinî tecrîdî ra zî wetêr a. Na rewşe ganî hinda yewna qeyde bêro pênaskerdene. Wa komara Tirkîya yewna name ci rê bivîna. Tîya goreyê şexsî caardişêk est o ke eleqeyê ci bi huqûqî çîn o. No caardişo sîyasî yo.”

Mehmet Ocalanî vera partîyanê bînan ê ke îdîa kenê ke ê demokrasîyî pawenê û vera bêhuqûqîye de bêveng manenê, nêrazîbîyayîş mojna û vat: “Nê partîyê ke derheqê her çîyî de qisey kenê vera neheqîya Îmraliyî qet qisey nêkenê. Ma goş qalanê vengana nêkewnê, ewnîyenê pratîkî ra. Ma heqê xo yê fermî û demokratîkî wazenê.”