Turnûvayê futbolî yê mabêne Amedspor û Fenerbahçe de ame kerdiş pêrodayîş vejîya. Serê pêrodayîşî de Fenerbahçe serê hesabê xo yê dîjîtalî û roportajê ke dayê çapemenîye de nameyê cinîyê ke sporwanê Amedsporî yê akerde vatî û kerdî hedef. Sporwana Amedsporî Hêvîdar Odungit ke hêrişê cinsîperest û nîjadperest ci rê ame kerdiş serebûtê pêrodayîşî ard ziwan û hêriş şermezar kerd.

Taximê Amedspor û Fenerbahçeyê cinîyan, hewteyê 17in ê turnuvayê futbolî yê Turkcellî de Amed de ameyî rî bi rî. Ver bi peynî de mabêne herdi taximan de pêrodayîş rî da. Dimayê pêrodayîşî sere de taximê Fenerbahçe û çapemenîye bi hawayêke akerde sporwanê Amedsporî Sultan Demîr pare kerd û hedef ramojna. Serê medyaya dîjîtale de zî hêrişê nîjadperest yê sey, “Kurd problemîn ê”, “Taximê terorîstan”, “Şewe koyan de roje seheyan”, “Şima futbol ra fam nêkenê, molotofan fam kenê” û eynî wextî de zî hêrişê nîjadperestî ameyî kerdiş.

Yew nê sporwanê Amedsporî ke serê medyaya dîjîtale de nameyê ci ame parekerdiş û hêriş ci rê ame kerdiş Hêvîdar Odungit bî. Derheqê hêrişê Hêvîdare de reaksîyonê xo ajansê ma rê pare kerd.

‘Vernîya serebûtî taximê hemver ame îqazkerdiş’

Hêvîdare serebût vizêr bi nê vatişan  şîrove kerd: “Turnuvayê vizêr ke ame kerdiş goreyê waştişê ma ame kerdiş. Serê medyaya dîjîtale de sey ke verpirsîyarê gengeşî tena Amedspor o ame lansekerdiş û Fenerbahçe xo sey mexdûr da ramojnayîş. Sere de seba ke çîyê ke hêvî kerdêne nêgirewtî, Kûlûbê  Yedek ê Fenerbahçeyî vatişê nînê kerdiş, vatî. Demê kaykerdişî de vernîya serebûtî çend rey taximê Fenerbahçeyî ame îqazkerdiş. Her reya ke mi taç xebitnayîne, vera ke temasêk min ê fîzîkî virazyo, mi ra çî vatêne. Ver bi peynî antronorê camêrd serê mi de ame û bi hawayêke wuşk hêriş kerd. Reyna cayê ke maç peynî bibo hakem bi hawayêke xo rê qerarê penaltî dayîne û maç derg kerdêne.”

‘Înan seba hêrişê bingeh awan kerdî’

Hêvîdare dîyar kerd ke seba hêrişî bingeh awan kerdî û vatî: “Deqeyê 90î de maç dewam kerdêne. Taxim nê dir tac xebitna û mi zî waşt bibî asteng. No zî heqê min o ke eke yew futbol ra fam bikero nê zano. Senîn beno ke taximêke hende xo aver vîneno, nêeşkeno nê fam bikero. Yê ke şaş fam kerdê yan zî waştê rewşe biancê cayêke cîya û gengeşe vejê, bi mehnaya mi hêrişê kaykerdoxa înan kerda, hêrişê mi kerdî. Înan ra yewe porê mi girewte û dorê mi de kom bî. Waştî mi biancê kulûbeyê xo. Cinî û camêrdan hêriş kerd. Embazê min ê ke rewşe dî, waştî bikewê mabêne ma. Dîmenêke lêşin a, labelê yê ke nê dîmenî rê bingeh amade kerdî û rewşe ver bi cayêke cîya de ant Fenerbahçe bi.”

 ‘Ma tehdîd kenê’

Hêvîdare vat, vizêrî ra ma rê tehdîdan kenê û serê medyaya dîjîtale zî parekerdişê nîjadperest û cinsperest yenê parekerdiş. Hêvîdare wina reaksîyonê xo ramojna: “Serê ma de kay kenê. Demo ke babete bena Amedspor vanê taxime padê. Demo ke şima çinbî, ma bî. Demo ke ma berê xo  taximê bînna rê akerd zî heme kayê kayê ma bê problem derbas bîne. Ma ra problem nêvejêno. Ma Amedspor ê, ma taximê şarî yê. Seba nê zî gengeşeyê bi nê rengî ma rê û nameyê ma rê nînê. No yewin nîyo û do peynî zî nêbo. Sey Amedspor nêheqî ma rê ameyîne kerdiş.”

‘Amedspor îmtihanê nê welatî yo’

Hêvîdare tewr peyîn wina vat: “Fenerbahçe keyepelê xo yê medyaya dîjîtale de nameyê sporwananê ma xebitnayî û hedef ramojnayî. Parekerdişanê xo de zî derheqê ma de vatişê nêbaş xebitnayî. No seba sporwananê ma rewşêka baş nîyo. No zî bi sebeb ke serê medayaya dîjîtale de ma rê tehdîd bêrê kerdiş û hêriş ma rê bêro kerdiş. Ma nêzdîbîyayîşê înan şermezar kenê. Amedspor îmtihanê nê welatî yo. Amed şar o. Ma do bi raporê kuwayîşî gerreyê înan bikerê.” AMED