Nêweşxaneyê Îbn El-Xetîpo ke Bexda de yo û nêweşê janê vîrusê korona ci de ameyêne dermankerdene de şewat vejîya. Goreyê cigêrayîşanê ewilan 45 kesan cuya xo vînî kerd. Şewat vera  Iraq de 3 rojan şîn ame îlankerdene

Goreyê xeberanê ROJnewsî, şewat şewa verêne saet 23.00î de vejîya û demêko kilm de pêroyê nêweşxaneyî da xo ver. Hêzê adirhewnakerdişî bi 10 grûbanê cîya cîyayan hewl dayî ke şewat hewna bikerî la pêroyê nêweşxaneyî veyşa.

Endamê Meclîsê Bexdaye Seîd El-Seîdî derheqê hadîseyî de televîzyonê El-Erebiye rê qisey kerd û vat ke heta nika 45 kesî awanîye ra ameyî vetiş.

Zafaneyê kesê ke nêweşxane de cenazeya înan ameyî vetiş, nêweşê janê vîrusê korona bî ke ameyêne dermankerdene. Sewbîna doktor û hemşîreyî zî mîyanê merdeyan de estî.

Cenazeyê ke nêweşxane ra ameyî vetiş sewqê morgê nêweşxaneyanê bînan yê bajarî bîyî.

Sebebê şewatî nîno zanayene, la goreyê tay çimeyan beno ke tupê oksîjenî yê nêweşxane teqabî. Tay çimeyê bînî zî vanê ke şewat kontaxê cereyanî ra vejîyayo.

Derheqê hedîseyî de tehqîqat dîya dest pêkerdene.

Serekwezîrê Iraqî Mistefa Kazimî şewat vera semedê 3 rojan (25-26-27 nîsane) şîn îlan kerd.

BEXDA