Naîme Fetah Aqîla ke şahîda Qirkerdişê Berxbotanî û dadîya şehîdêkê qirkerdişî ya wazena muhakemekerdişê cerganê DAIŞî de cabigêro.

DAIŞî 25ê hezîrana 2015î de Kobanê de dewa Berxbotanî de dabî sivîlan ro. Goreyê eşkerayîya Fermandarîya YPGyî ya Kobanê netîceya hêrişî de 233 sivîlî Berxbotan de û 210 sivîlî de merkezê Kobanê de ameybî qetilkerdene û 273 sivîlî zî birîndar bîyî. Reyna nê hêrişan de 14 endamê Asayîşî, endamêkê TEV-DEMî, endamêkê Yewîya Ciwananê Rojawanî zî şehîd bibî. 

Îdareyê Xoserî yê Rojawanî 10ê hezîrane de pare kerdbî ke ê do cerganê DAÎŞî muhakeme bikerê. 

Dayîke Naîme pare kerd ke lajê ci Metîn hêrişê DAIŞî de Parka Kobanê ya Mihetî de şehîd bîyo û vat: “25ê hezîrane de DAIŞî hêriş kerd û çi cinî çi domanî her kes qetil kerd. Cergan pê kincanê YPGyî hêriş kerd, bi îşkenceyî şar qetil kerd. Ez bi xo şahîda nê çîyan a. Tay kesî hewn de tay kesî mîyanê baxçeyan de ameyî qetilkerdene.”

Dayîke Naîme îfade kerd ke ganî ê hêz û kesê ke paştî danê DAIŞî zî bêrê muhakemekerdene û vat: “Kesê ke paştî danê DAIŞî merdimatîye ra bara xo nêgirewta. Eke welatêkê bînî de qirkerdişo winayên bibîyêne cade nê kesî ameyêne cezakerdene. La wexto ke kurdî yenê qetilkerdene çew vengê xo nêkeno.”

Dayîke Naîme vist vîrî ke tewr tay 10 hezar cergê ke hemwelatîyê welatê bînî yê zîndanan de yê û ganî nê cergî bêrê muhakemekerdene. Dayîke Naîme vat: “Bira muhakemekerdişî ya Îdareyê Xoserî girîng a. Ma sey keyeyanê şehîdan paştî danê na bire. Ganî dezgeh û rêxistinê mîyanneteweyîyî zî seba muhakemekerdişê DAIŞî têbigêrê. Kesê ke şahîdê qirkerdişanê DAIŞî bîyê, raştê kerdişanê DAIŞî ameyê wa prosesê muhakemekerdişî de cabigêrê. Îdareyo Xoser bi serran o DAIŞ zîndanan de tepişeno. La hînî ganî nê cergî verê keyeyanê şehîdan de bêrê muhakemekerdene, sûcê înan wa bêrê eşkerakerdene û terefgîrê ci bêrê eşkerakerdene.”