Endama HDPyî Denîz Poyraza ke Îzmîr de amebî qetilkerdene serrgêra 1. ya qetilkerdişê xo de  ameye yadkerdene.

Aktîvîstanê Têgêrayîşê Cinîyan ê Azadan (TJA), Rêxistina ‘Cinîyî Pîya Bihêzêr ê’ ya Îzmîrî, Rêxistina HDPyî ya Îzmîrî serrgêra qirkerdişê ci de Denîz Poyraze warê Cumhurîyetî de eşkerayîyêke daye çapemenîye.

Wextê eşkerayîye de pankarta bi nuşteyê ‘Wext wextê ci yo ke ma Denîze bîyarê’ ameye akerdene û sloganê sey ‘Cinîye, Cuye, Azadîye’, ‘Denîz Poyraze serewedaritişê ma ya’ ameyî vatene.

Dadîya Denîz Poyraze Fehîme Poyraze, keyeyê aye, parlamenterê HDPyî Ayşe Acar Başarane, Gulîstane Kiliç Koçyîgîte û xeylêk cinîyî tewrê yadkerdişî bîyî.

Dîdar Gule Rêxistina ‘Cinîyî Pîya Bihêzêr ê’ ya Îzmîrî ser o qisey kerd û vat: “Ma do her ca de vajê Denîz Poyraze, ma de edaletî tim biwazê. Serrêke nê hezar serrî zî derbaz bibê ma do nê têkoşînî ra amegêrê.”

Gulîstan Kiliç Koçyîgîte zî îfade kerd ke têna pê cezakerdişê kiştox Onur Gencerî nêbeno ganî her keso ke HDPyî krîmînalîze keno, bêro cezakerdene. Koçyîgîte vat: “Şima nêeşkenê pê qirkerdiş û tedayan ma çin bikerê. Heta ke ma qirkeran ra hesab bipersê têkoşînê xo rê dewam bikerê. Ne HDP, ne cinîyî ne zî kurdî şima ra tersenê. Ma soz da ke Denîze ke wayûbirayîye û aştîye bîyarê nê welatî. Se beno wa bibo ma do Tirkîyaya demokratîke biafernê. Roşnîya Denîze do tarîyîya nê welatî roşnî bikera.”