Krîzê ekonomîk polîtîkayanê îqtîdarê AKP-MHPyî ra sebeb her roje beno giranêr. Hemwelatîyanê Dêrsimî derheqê krîzê ekonomîkî û reşwa cuya înan de Ajansê Mezopotamya rê qisey kerd.

Hemwelatî Hasan Çîçekî ard ziwan ke ê hînî nêeşkenê nan berê keyeyê xo û vat: ”Ez 2 hezar lîra meaşê astengdarî gêna la o zî qîm nêkeno. Faturayê ceyran, awe ûsn. hê pêser ê. Ma nêeşkenê ardan bigêrê. Pêlekê ardan 400 lîra ya. Ma nêeşkenê xo bidevirnê her çi zaf vay o.”

Yemoş Dalgiçe zî îfade kerd ke her roje vaya berheman zêdîyena û vat: ”Ma nêeşkenê marketî ra çîyêk bigêrê. Zengînî benê zengînêr, feqîrî benê feqîrêr. Verî ma şîyêne dewe, uca de her çi ber ardêne la nika îmkano winasên zî çin o.”

Hidir Kulluyî da zanayene ke meaşê ci 2 hezar û 400 lîra yo û vat: ”Îqtîdar vano ma eşkenê pê nê meaşî îdare bikerê. O çax wa ê nê meaşî bigêrê. Ganî yew merdimo teqawutbîyaye tewr tay 4 hezar lîra meaş bigêro.  Vaya nanî bîya 4 lîra. Welat de berardiş çin o. 20 serran de ma kewtê nê halî.”

Ramitoxê taksî Selçuk Çiglikî eşkera kerd ke lajê ci nêweşxaneyê taybetî de xebitîyeno la semedo ke o pere qîm nêkeno, o zî lajê xo rê pere şaweno. Çiglikî vat: ”Vaya benzînî ra ma zî tengasîye de yê. Ma bire daye ke 2 mengan vaya taksî mezêdînê. La ma heta key daymîşê ney bibê nêzanena.”

Hemwelatî Bulent Yukselî pare kerd ke welat de krîz û kaosî hukm kenê û vat: ”Merdimî pê propagandayan xapîyenê. A raşte çew nêeşkeno debara xo bikero. Welat de meseleyî pîl ê, feqîrîye esta. Tay merdimî estê ke çopan ra nan û werd arê danê.” DÊRSIM