Dewa Civrakî ya Dêrsimîya ke wextê Terteleyê Dêrsimî de raştê barbarîyêka pîle amebî nê serran erjanê xo afernena.

Dewa Civrakî ya qezaya Qisle ya Dêrsimî 1938 de Terteleyê Dêrsimî de raştê barbarîyêka pîle amebî. Dewlete dima dewe de polîtîkaya asîmîlasyonî û koçkerdişî arde ca. Hemwelatîyê Civrakî hêdî hêdî agêrenê dewa xo.

Dewe de bi beşdarîya Parlamenterê HDPyî yê Dêrsimî Alîcan Onluyî aktîvîteyêke ameye kerdene. Aktîvîte de Saît Baksî, Mehmet Toptaş û Şenol Akdagî kilamî vatî.

Alîcan Onluyî aktîvîte de qisey kerd û vat: “Tertele de tewr zaf dewa Civrakî dej ant la dima Civrakî erjê xo afernayî. Wezîfeyê ma sîyasetmedaran o ke nê îqtîdarî biqedînê.”

Onluyî bale ante ser ke dewe de qereqolî ra vengê ezanî dîyeno û vat: “Bawerîya na dewe elewîtî ya. Bêhûrmetîyêka pîl a ke qereqolî ra ezan veng dano. Tirkîya de qet yew qereqolî ra vengê ezanî nêdîyeno la seba ke na dewa elewîyan a no yeno kerdene.”

Şaredarê Dêrsimî Mehmet Maçogluyî zî venga pêro hemwelatîyanê dewe da ke wa abigêrê erdê xo ser.