Dewijê mezraya Şurtêmevnî ya qezaya Licê ya Amedî yê ke ci rê koçkerdiş yeno ferzkerdene, nêwazenê herra xo ca verdê û çareserîyêke wazenê.

Erdlerzê Mereşî tesîrê 11 bajaran kerd. Nînan yew zî Amed û dewê ey bîyê. Licê de mezraya Şurtêmevnî de xeylê banan xesar girewto. Seba ke dewijî nêeşkenê keyeyanê xo de bimanê, nê serdî de xeyman de manenê.

Dewij Mehmet Oyunluyî (78) ard ziwan ke demê erdlerzî de nêeşkîyayo bivejîyo teber û wina vat, ‘‘Dewe ra çîyêk bi kesêkî nêame, la heme banan xesar girewto û rijîyayê. Ez zaf xemgîn bena seba ê kesan ke nas û dostê xo binê xirban de vindî kerdî.’’

Nêeşkenê dekewê keyeyanê xo

Oyunluyî dîyar kerd ke xeymê ke înan rê ameyê erşawitene, karê înan nêvînenê û wina dewam kerd, ‘‘Ma 12 kesî xeymêke de manenê, hûmara ma zaf a la xeyme zaf şenik a. 6-7 domanê şenikî est ê. seba înan zaf zehmet o. Wexto ke varan vareno xeyme dalpê kena. Ma xeymêkê nînî erzenê ser o ke wa awe nêro war. Seba ke xo bişuwê û hewcedarîyanê bînan, ma dekewenê bananê xo yê xesarinan. Heywanê ma est ê axuran de. Ma seba înan zî xeymî waştî, la AFADî nêdayî ma. Ma ra vanê koçê bajarî bikerê. Ma nêeşkenê bajaran ra biciwîyê. Tîya de bostanê ma est ê, ma eşkenê biramê xo rê debarê xo bikerê la bajaran ra eşkenê se bikerê? Ma fek dewa xo ra nêverdanê.’’

Ê agêrayê dewa xo

Oyunluyî erdlerzê 1975î ard vîrardene û wina dewam kerd: ‘‘Serra 1993î de dewa ma ameye veşnayene. Ê zimistanî de ma koç kerd û şîyê Amed. Ma dî ke ma nêeşkenê debarê xo bikerê, ma reyna agêrayê dewa xo.’’

Ma çareyêke wazenê

Dewij  Raîf Yakaciyî (69) zî dîyar kerd ke xeymê ke ameyê erşawitene, karê înan nêvînenê û dewam kerd, ‘‘Ma wazenê ke konteyniran bidê ma. Dewa bi 18 keyeyan a. Pêro xesar girewto. Qaymeqamî vat, ‘koç bikerê şêrê Licê yan zî koçê Amedî bikerê, ma kîraya şima danê’ ez nêzana no çend rast o la ma qebul nêkenê. Ma heywananê xo kamca de verdê û şêrê? Ma fek dewa xo ra nêverdanê, wa ma rê çareyêke peyda bikerê.’’

Medîne Yakaci zî vat, ‘‘Şima zî vînenê ke banê ma rijîyayê. Gere banê ma bêrê viraştene. Ma heta key xeyman de biciwîyê? Eke ê eşkenê nê serdî de xeyman de bimanê, ma zî eşkenê bimanê. Eke ê nêeşkenê wa bêrê bananê ma bivirazê.’’

2 serrî xeyman de mendbî

Mûstafa Yakaciyî (83)  vat; ‘‘Eke dewlete biwaza eşkena banan biviraza. Ma ban wazenê. Erdlerzî ra dima xeyman vêşêr çîyêk nêkerda. Xeyman de ceyran çin o. Ma nêwazenê dewa xo ra şêrê. Ma şêrê kamca? Erdlerzê Çewlîgî de zî banê mi xesar girewtbî. Ma di serrî xeyman de mendê.’’