Selahîyetdarê dewleta tirke xebatanê cigêrayîş û xelisnayîşî nêkenê û hûmara raşte nimnenê.
Goreyê eşkerayîyanê selahîyetdaranê dewleta tirke erdlerzan de heta nika 3 hezar û 432 kesan dinyaya xo bedilnaye. Nêzdî 21 hezar kesî birîndar bîyî û 7 hezar bînayî rijîyayî û hema bi hezaran kesî binê rijnayîşî de yê. Şertê hewayî zî xebatanê xelisnayîşî sero tesîro xirab keno.
Çimeyê herême vanê ke bi hezaran kesan dinyaya xo bedilnaye, dewleta tirke hûmara raşte nimnena û vergirewtişan nêgêna.
AFAD badê 15 saetan ame Pazarcix
Ekîbê AFADî badê 19 saetan ameyî Pazarcix. Ekîbî çar bînayan de xebate kenê la bi desan bînayan de xebatî nînê kerdene. Hemwelatîyî bi îmkananê xo xebatanê xelisnayîşî kenê. Nêweşxaneyê Dewlete rixmo ke xesarin o xizmet dano.
Semsûr qederê xo rê ameyo caverdayene
Semsûr de xebatê xelisnayîşî nêameyî destpêkerdene. Bajaro ke bi seyan bînayî rijîyayî de şar pê îmkananê xo xebatanê xelisnayîşî keno. Zereyê roje de bi desan kesî binê xirabeyan ra ameyî vetene û yeno vatene ke bi seyan kesî hema binê xirabeyan de yê. Bajar de ceyran çîn o, şebekeyê xeylêk xetanê telefonan birnayeyî û malzemeyê xida kêm ê.
Nîmeyê Elbîstanî rijîya
Erdlerzê diyînî de nîmeyê bînayanê Elbîstanî rijîyayî. Xesarî ra çew neêşkeno tede bimano. Qeza de hûmara merdeyan merheleya girane de ya. Dewan de zî xesaro gird est o, şar vano ekîbê xelisnayîşî nêresayê ci.
Hatay de 872 kesan dinyaya xo bedilnaye
Hatay de 872 kesan dinyaya xo bedilnaye û 2 hezar û 766 kesî birîndar bîyî. Bajaro ke hezar û 278 bînayî rijîyayî de hema ekîbê hetkarî nêresayî ci.
Yeno vatene ke Antakya, Kirikhane, Defne, Samandag, Îskenderun de bi des hezaran kesî binê rijnayîşî de mendî. Bajar de bînayêke zî nêmenda ke merdim tede bimano.
