Serdozgerîya Komare ya Bursa nuşteyê ‘Ya bi tirkî qisey bikerê yan zî qisey mekerê’ sey suc nêhesibna.
Serê nêrdîwananê Dibistana Mîyanêne ya Ramazan Okurî ya Bursa de nuşteyê ‘Ya bi tirkî qisey bikerê, yan zî qisey mekerê’, ‘Ziwanê ma nasnameyê ma yo’, ‘Ma ziwanê xo ra nêşermayenê’, ‘Kêmasîya tirkî çin a, yê to est a?’, ‘Tirkî sey şitê dadîye ganî ziwanê ma pakî bikera’ ameybî nuştene.
Nê nuşteyanê nîjadperestan ra Serekîya Baroyanê Wan, Amed û Şirnexî ‘mîyanê şarî de dişmenîye teşwîq kena’ Dozgerîya Komare ya Bursa rê gerreyê dibistane kerdbî. Serekê Baroyê Wanî Sînan Ozarasî, Serekê Baroyê Şirnexî Rojhat Dîlsîz û Baroyê Amedî gerreyê mudirê dibistane Mehmet Tapçi û îdarekaranê bînan ê dibistane kerd.
Dozgerîya Komare ya Bursa gerreyê baroyan ercna û bire daye. Dozgerîye vat: “Nuşteyî hetê tedeyîye ra suc nîyê û ganî nêrê teqîbkerdene.” Dozgerîye bire daye ke babete nêra teqîbkerdene.
