Serekê Egitim-Senî yê Wanî Murat Atabayî îfade kerd ke ganî kurdî ziwanê xo yê dayîke de perwerde bivînê û wina vat: “Dersa weçînite heqaret a. Ma wazenê wa heqê perwerdeyê bi ziwanê dayîke bêro şinasnayene.”

Menga êlule de 20 hezar mamostayî do bêrê tayînkerdene. La seba mamostayanê kurdkî têna 3 kontenjanî dîyayî kişte. Serekê Egitim-Senî yê Wanî Murat Atabayî derheqê babete de Ajansê Mezopotamya rê qisey kerd.

Atabayî îfade kerd ke Egitim-Senî qetî nêwaşt ke kurdkî sey dersa weçînite bêra pêşkêşkerdene û wextê Prosesê Çareserîye de seba dersa kurdkî bi bahaneya ‘mamostayî kêm ê’ sinifî nêameyî akerdene.

Atabayî vat: “Tirkîya de 30 mîlyon kurdî estê la kurdî nêeşkenê kursanê kurdkî abikerê. Pêro dezgehê kurdkî bi biranê KHKyî ameyî qefilnayene. Heqê kurdan o ke bi ziwanê xo yê dayîke perwerde bivînê. Dersa weçînite heqaret a. Dersa weçînite yena manaya ‘Ti û tirkî sey ci nîyê.’ Ma wazenê wa heqê perwerdeyê bi ziwanê dayîke bêro şinasnayene.”

Atabayî bale ante ser ke her serre 200 wendekarî beşanê kurdkî yê zanîngehan ra benê mezûn û vat: “Dewlete neçare ya ke nê mezûnan tayîn bikera. 3 kontenjanê seba kurdkî nêzdîbîyayîşê dewlete eşkera kenê. No yeno a mana ke dewlete seba ke dersa kurdkî nêra weçînayene her çî kena. Seba ke wendekarî kurdkî nêweçînê dewlete her çî kena û wexto ke weçînenê zî bi bahaneya ‘mamostayî çin ê’ sinifan anêkena.”