Amed, Dêrsim, Anqara û xeylêk bajaranê bînan de dezgehanê elewîyan hêrişî şermezar kerdî.
Anqara de roja verêne ya rojeyê Muharemî de bi hawayêkê hemwextî vera Cemxaneyê Ana Fatma, Cemxaneyê Şahê Merdan, Komeleya Dewa Gokçebali û Weqfa Elewîyanê Bektaşîyan a Terekeme hêriş ame kerdene. Vizêr Amed, Dêrsim û xeylêk bajaranê bînan ê Kurdistan û Tirkîya de hêrişî ameyî şermezarkerdene.
Amed de verê Komela Kulturî yê Pîr Sultan Abdalî (PSAKD) de eşkerayîye ameye dayene. Parlamentera HDPyî Meral Daniş Beştaş û îdarekarê HDP, EMEP û ESPyî yê bajarî zî tewrê çalakîye bîyî. Hemserekê PSAKDyî yê Amedî Aydin Atliyî veng da ke wa vera provokasyonan hîsgêr bêro têgêrayene û vat seba ke hêrişkarî bêrê tepiştene têkoşîn bikerê. Meral Daniş Beştaşe zî vat: “Ê yê ke komelî verdanê pê do peynî de vînî bikerê. Tena bi destbendkerdişê yew kesî şima nêeşkenê ma bixapînê. No hêriş tena hetê yew provokatorî ra nêame kerdene. Îqtîdaro ke cemxaneyan sey îbadetxaneyî qebul nêkeno, berpirsîyarê nê hêrişan o.”
Dêrsim de zî serkêşîya Komela Elewîyanê Demokratîkan (DAD) de Kuçeyê Sanatî de eşkerayîye ameye dayene. Eşkerayîya ke bi seyan kesî tewrê ci bîyî de Hemserekê Pêroyî yê DADî Musa Kuluyî qisey kerd. Kuluyî vat: “Înanê ke hêrişê cemxane û dezgehanê ma kerd wa bizanê ke nê hêrişî nêeşkenê verê têkoşînê ma yê azadîye û demokrasîyî bigêrê. Ma verê zextan û polîtîkaya şîdetî de milê xo çewt nêkenê. Ma tim vera neheqîye û hêrişan vejîyayî ma do tim sereberz payra bibê.”
Cemxaneyê Xozatî de zî bi eşkerayîyêke hêriş ame şermezarkerdene. Eşkerayîye de wina ame vatene: “Wa no bêro zanayene ke şima heta ewro bi kiştişê gananê ma û hêrişê vera bimbarekanê ma nêeşkayî ma biqedînê û ewro ra tepîya zî şima do meeşkê ma biqedînê. Ma kerbela ra heta ewro vera neheqîye milê xo çewt nêkerd û bêveng nêmendî. Hêrişê Anqara bi nameyê demokrasî û îdareyê welatî yew ewbo pîl o.”
Reyna Semsûr, Anqara, Îstanbul, Adana de zî hetê dezgehanê elewîyan hêriş ame şermezarkerdene û ame vatene ke elewîyan senî ke hetê ewro vera hêrişan çok nêda do ewro ra tepîya zî wayîrê ercanê xo vejîyê û verê zextan de çok medê.
