Partîya Çep a Keske Qezaya Fatîhî ya Stenbolî de xebatanê weçînayîşî domnena û xeylê eleqeyêkê girdî vînena.

Vervatoxê Buroyê Weçînayîşî yê Partîya Çep a Keske Turgut Basunluyî derheqê xebatanê buroyî de qisey kerd û da zanayene ke seba ke Fatîh hîra yo înan hîrê herêmanê ci de cîya bi cîya xebatan kenê.

Basunluyî ard ziwan ke merdimê ke verî partîyanê bînan ra bîyê, buroyê înan zîyaret kenê û paştî danê Partîya Çep a Keske. Basunluyî vat: ”Welat hewceyê way û biratîye, aştîye û têdûştîye yo. Coka ma paştî danê Partîya Çep a Keske. Fatîh de kesê ke cemaetî ra yê, zî yenê vanê ke ê do raya xo bidê ma. Sey Partîya Çep a Keske ma bi xurtî bikewê Meclîsî. Ma pê şarê xo û pê xo bawer ê.”

Salîh Tîmurtaşo ke wextêkê dergî ra nata Fatîh de karanê HDPyî de cagêno vat: ”Ma refanê şarê xo de cagênê. Çunke ê kesê ke şarê xo rê fayde nêkenê, çewî rê fayde nêkenê. Ma rîcaya şarê xo kenê û wayîrê raya xo vejîyenê.”

Mehmet Işiko ke amedij o û 55 serrî yo Fatîh de ciwîyeno ard ziwan ke ê keyeyan zîyaret kenê û xebatanê weçînayîşî kenê. Işikî vat: ”Ma venga pêro kurdan danê ke beno ke heta nika sebebanê cîyayan ra raya xo daya partîyanê bînan la nika wa raya xo bidê Partîya Çep a Keske.’