Şaristananê Kurdistanî de dewleta tirke her tim hemverê têgêrayîşê kurdî her hêzo tarî şuxilna. Tayê kurdan hetêk ra vera pergala faşîste têkoşîno bêhempa kerd, tayênan zî îdareyê tirkî reyde “hemkarîye” kerde. HUDA PAR mîyanê hemkaranê dewleta tirke de cayêkê verênî gêno.
Nika Bakurê Kurdistanî de umûmî di hêzî xizmetê îşxalkerîye kene: cerdevanî û HUDA PAR. Key ke îşxalkerî serdestîya xo restore kenê yan hêzdar kenê, nê qewetan ra hetkarîye gênê. Na çarçewa de cerdevanan bi serran xeylê qetlîyamî kerdî yan tewrê qetlîyamanê artêşa tirke bîyî. Ê her tim sey “rime” şuxilîyenê. Serê partîyanê ke polîtîkaya kolonîzekerdişî rayra benê de bira cerdevanî estê.
Cinîyêka femînîste kişîyaye
Qeweto bîn o “hemkar” bêguman HUDA PAR o. Na partî 19ê kanûna 2012î de ronîyaye. Birastî kokê partî şino heta Hîzbullahî. Xora selahîyetdaranê partî eşkera kerd ke ê Hîzbullahî sey rêxistina terorî nêşinasnenê. Yeno zanayene ke Hîzbullahî bitaybetî serranê 1991-1999an de vera têgêrayîşê kurdî xeylêk qetlîyamî viraştî. Têna vera kurdan nê, eynî wextî de vera merdimanê averperestan zî. Mîsal Konca Kurişe yanî “cinîyêka femînîste” serra 1998î de Konya de bi destê Hîzbullahî 38 rojî îşkence dî û ameye qetilkerdene.
Hespa Truva ya AKPyî
HUDA PAR wezîfeyê xo yê “stratejîkî” do wextê 14ê gulane de kay bikero. A do sey “hespa Truva” fermanê wayîrê ci bîyaro ca. Xora îdareyê partî eşkera kerd ke ê do tewrê Îtîfaqê Cumhurî bibê. Yeno îdîakerdene ke asayîşê weçînayîşî zî dîya HUDA PARî. Labelê şaro welatperest do “berbanê” AKPyî rê destûr medo. Hemkarîya cergan weçînayîş de do cewabêkê başî bigêro.
