Çarçewa Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ de Ewropa de kampanyaya Îmraliyî rê erşawitişê karpostalan dîyaye destpêkerdene.
Kampanya serkêşîya KCDK-E de 8ê çeleyî de dest pêkerd. Hemsereka KCDK-E Zubeyde Zumrute ard ziwan ke înan xeylêk wextî ra amadekarîya na kampanya kerdêne, kartpostalî amade kerdê, vila kerdê û bi nê hawayî startê kampanya dayo.
Kartê ke bi îngilîzkî, kurdkî, fransizkî ûsn. amade bîyê tede azadîya Serekê PKKyî Abdullah Ocalanî yena waştene û derheqê çareserîya meseleyanê cinîyan, globalan û kurdan de mesajî dîyenê.
Mesajan ra tayênî wina yê:
“Birêz Abdullah Ocalan;
Ez seba paştdayîşî to rê nusena. Ewro cinîyî her ca de seba heqanê xo têkoşîn kenê. To wina vatbî ‘Heta ke cinîyî azad nêbê komel azad nêbeno.’ To sloganê Jin, Jiyan, Azadî sey îlhamî da dinya! Ez zî sey to fikirîyena û seba ke fikrê to bêro ca ez azadîya to wazena.”
“Birêz Abdullah Ocalan,
To vatbî ke ‘Vêşanîye, bêkarîye, şerî û talanî netîceyê îxanetê vera ekolojî yê. Komelo ke ekolojîya ci çin a, weş nîyo.’ Ez bi pêro zerrîya xo nê perspektîfê to tesdîq kena û seba ke fikrê to yê serê ekolojîya sosyale bêrê ca ez azadîya to wazena.”
