Nanê dewleta tirke qetlîyam ê. Bingeyê ci de qirkedişî est ê. Eke dewletêke bi destê cergan û mafya yena îdarekerdene, uca de qetlîyam û suîkastî kêmî nêbenê. Çike qanûn yan huqûq fonksîyonel nîyo. Cergî birastî alozîye û kaos ra hez kenê. Aramîye û huqûq çimanê înan de sey gefî hesibîyenê. Senî ke maseyî awa lêşine ra feydedar benê, dewleta mafyatîke zî bêhuqûqîye û bêedaletîye ra feyde gêna.

Heta ke nê cergî îqtîdarî gênê binê bandora xo, persa kurdan zî nêna çareserkerdene. Seba ke persa kurdan bêro çareserkerdene, ganî huqûq bixebitîyo. Aramîye û weşhalîya şaranê Tirkîya û Kurdistanî girêdayîyê norman ê. Coka cergê dewleta tirkan her tim huqûqî pasîfîze kenê ke persa kurdan reyde nêrê têrî.

Dewlete de exlaq û etîk çîn o

Îdarekaranê tirkan de qetî exlaq û etîk çîn o. Bitaybetî çarçeweya persa kurdan de her metodî şuxilnenê. Hem heyetanê kurdan de pêvînayîş kenê, hem zî piştîya kurdan ra nanê pa. Merdim na hişmendîye bitaybetî qetlîyamê ronayoxanê PKKyî ra Sakîne Cansize (Sara), Temsîlkara Parîsî ya Kongreya Neteweyî ya Kurdistanî Fîdan Dogane (Rojbîn) û endama Têgêrayîşê Ciwananê Kurdan Leyla Şaylemeze (Ronahî) de bi zelalî vîneno.

MÎTî serûber kerd

Zanîyeno ke 3ê çeleyê 2013yî de mabênê heyetanê dewleta tirkan û Îmrali de pêvînayîşan dest pêkerd. Qaso ke armancê wirdî hetan çareserkerdişê meseleya kurdan bî. Labelê hewteyêkî dima yanî 9ê çeleyê 2013yî de Parîs de hîrê cinîyê şorişger, welatperest û qedrberzî bi destê tirkan ameyî qirkerdene. No serebût zaf ame nîqaşkerdene. Gama ke merdim ewneno kerdoxanê nê qetlîyamî ra, raştê xeylêk têkilîyanê tarîyan yeno. Serra 2017î de Başûrê Kurdistanî de 2 îdarekarê MÎTî yê girîngî tepişîyayî. Nê di îdarekaran bitaybetî qetlîyamê Parîsî ser o tayê melumatê balkêşî pare kerdî. Înan vat ke merdimo ke mîyanê heyetê dewlete de tewrê pêvînayîşan bîbî qetlîyamê Parîsî serûber kerd. Dima ra cigêrayîşan dewam kerd û eşkera bî ke peyê tetîkkeş Omer Guneyî de yew merdimo “efsûnkâr” est o. No merdim MÎT de wayîrê cayê “berzî” yo û tebîî nameyê xo yê kodî (Ozan) şuxilneno. Goreyê zanayîşanê HDPyî “Ozanî” verde serra 2008î de pêvînayîşanê PKK û MÎTî yê Oslo, Bruksel û Cenewreyî de ca girewto.

Omer Guney qestî kişîya

Cînayet hema zî nêameyo roştîkerdene. Wina aseno ke dewleta xorî ya tirkan seba astengkerdişê pêvînayîşanê aştîye no cînayet serûber kerd. Hukmê Fransa derheqê qetlîyamî de nêzdî 3 serrî tehqîqatêk kerd û bire dîyaye ke Omer Guney 23yê çeleyê 2017î de bêro muhakemekerdene. La Guney roniştiş ra 36 rojî verî “şî heqîya xo”. Bêguman çewî bawer nêkerd ke Guney merd. Mergê ey şikdar bî. Merdim guman keno ke MÎTî tetîkkeşê xo werte ra wedarna. Sewbîna ey do mehkeme de xeylêk çîyan bivatêne.

Asayîş ra pasaport girewt

Bado avûkatanê dewa yewna îtîraz kerd û nîsane 2017 de derheqê rolê MÎTî de tehqîqatêko verên ame akerdene. Avûkatê dosya Jean-Louis Malterre dîyar kerd ke çarçeweya tehqîqatê newî de rolê MÎTî do bêro tehqîqkerdene. No dem Tirkîya de zî tehqîqatêkî dest pêkerdbî. Ame eşkerakerdene ke Omer Guney reya verêne 22yê tebaxa 2012yî de ameyo Anqara û seba pasaportê çîpinî Mudirîya Asayîşî ya Anqara rê beşdar bîyo. Guneyî 24ê tebaxe de pasaportê xo girewto û mîyanê serrêke de 13 reyî dekewtiş û vejîyayîş kerdo.

Cînayetî verî ameyo Anqara

Tehqîqat de ame zelalkerdene ke Omer Guney cînayet ra 19 rojî raver yanî 18ê kanûna 2012yî de Parîs ra ameyo Stenbol û uca ra derbasê Anqara bîyo. Kiştox tîya de 3 rojî mendo û dima ra bi eynî rayîrî agêrayo bi Parîs. Bêşik nî zîyaretî, dekewtiş û vejîyayîşî têkilîya Guneyî bi MÎTî hêzdar kenê.

‘9ê Çele derbe ya’

Serekê PKKyî Abdullah Ocalan qetlîyamî wina ercneno: “Qurbanê Gladîoyî yê tewr peyênî Sakîne Cansiz û embazê ci bîyî. Peyame vera ma dîyena. Ê vanê ke ‘PKK wina yeno çaresekerdene’. Derbeya 9ê Çeleyî derbeya qedînayîşê prosesî ya. No serebût nuqtayê şikîyayîşî yo. Senî ke Abdulhamîd taht ra ame war û Mahmudê II. Adircayê Yenîçerîyan wedarna, no serebût zî sey înan muhîm o.”