Însan cisn ra heywan o, tewîr ra însan o. Çîyo kê însanî heywanî ra abirneno exlaq o, eke exlaqê însanî çînê bo zobîna heywano ra ferqê xo çîn o. Hal ke nîyaro, tayê însanî heywanîye ra nat nêwazenê bêre nata, çûnkê exlaqê însanîye înan rê giran êna. Însan o ke exlaqê însanî tede esto, însanî rê îşkence nêkeno, însanî nêkişeno. Hewlîya çîmî baş vînîtena, hewlîya mezgî, fikrê baş fikirîyayîş o. Hewlîya însanî her daîm hewlbîyayen a. Fikrê karderê însanê hewlî averberdena însanî ser bena. Eke însan însano hewl nîyo, destevera î ra her xirabîye êna.

Nê rozanê verê ma de, Tirkîya de weçînayîşê serokqomî û parlamenterî beno. Labelê no weçînayîş pak nîyo. Nika şima vanê Tirkîya de her waxt pak nêbî, raşt a. DEPî ra hata nika dewleta tirke kamcî partîya kurdan bîye, aye ser zulm û zordarîye kerde, nî partîyê kurdan ya pêro girewtî yan zî gerê bî gerê fetelnayî. Labelê nê weçînayîşî de tenya dewlete nê, êyê ke xo ra vanê ma çep îme zî HDP serê kara qomî ser nê, kara xo ser hesibna. Partîya TÎPî xo leweyê HDPyî de musna, labelê zobîna hesibî kerdî. Yew het ra TÎP fekê pîya bîyayene raverda tenya TÎP arde ma verî, yew hetî ra kî medya û televîzyono de her waxt TÎPijî dayî qisey kerdenê. No kay averî ma weçînayîşê şaredarîya Dêrsîmî de dî. Dûştê HDPyî de Maçoglu ard verî, televîzyono de her roz qalê î kerd, dûştê çepê kurdan de “komunîstê” xo amade kerd. Nika kî TÎP vecîya zerê hempeymanêy ra, la fikr û qisey xo tenya xo ser o, zobîna kes çîn o. Peynî de Ahmet Şik faşîst o ke zerê de xo eşkera kerd, kurdî pêro kerdî “faşîst’’ . Tîya de ma vînenîmê ke, eke qese ama kurdan ser çep û rastê tirkî rê ferq çîn o, pêro yew çim ra seyrê kurdan kenê. Gêretê înan xeleskerdena şaran nîya, tenya xo xeleskerden a. Yew fragmanê Herakleîtosî esto, “însanî êne qayîl nêbene bedilnenê, la xo nêbedilnenê.’’ Nê qeseyî de çi fam kenîmê, derdê tayê însano tenya wazenê dîktator û tîrano bibedilnê, cayê înan de xo bîyarê dîktatorîyê. Rol nêbedilîno, tenya aktorî bedilînê. Partîya TÎPî waşt kurdan ser o xo awan bikero, la haqa kurdan zî bikero binê ardî.

Sîstemê dewleta tîrke peynîya seserre de xetimîya, teybetmendîye ra îqtîdarê AKPyî de çî pa nêmend. Îqtîdarê AKP-Erdoganî zerrê xerepîye de îdare kerdê dewlete. Aseno ke dewleta xorî ya tirke zî yew vecîyayîş gêrîna. Labelê tenya yew partî ser kay nîyardo pêser, hetê ra destek dana CHP û yekîtîya ke dormê CHPyî de ameye pêser, yew hetê ra zî têmnayî destek dana Erdoganî. Beno ke Erdogan reyna serkewtîş bîgêro xo dest,  î wazenê cuya xo dewam bikerê. La hetê ra kî ebê destê mafya ra eyar danê Erdoganî. Erdoganî dî ke weçînayîşî keno vîndî, heyet erşawit Îmrali, leweyê serokê kurdan birêz Ocalanî. Key ke Ocalanî ra destek nêgirewt, tepîya dest pê kerd faşîzme xo duşiyayîşê kurdan ser kerd. Kurdo ra va “terorîst”, elewîyo ra va “tewîr’’. Çûnkê Erdoganî de exlaq çîn o, ne exlaqê însanî esto ne kî exlaqê sîyasetî. Erdogan însanîyê ra kêmî bî, nika aqil ra kî bî kêmî. Çûnkê baş zano îqtîdar dest ra şono.

Tirko seserra avere sayeyê kurdan ra “komare (cumhurîyet)’’ îlan kerd, nika reyna sayeyê kurdan ra wazenê a komara xo destê Erdoganî ra bîgêrê. Kurdî nê weçînayîşî de kîlît ê, kurdî reyê xo biderê kamî, o kare keno. Î baş zanenê ke eke yew partîya faşîste bîyarê averî, kurdî reyê xo nêdanê, o semed ra pêro partîyê rastî dormeyê CHPyî de arê kerdî. CHP çixaş vano ma çep îme, na rastî nîya. CHP zerrê rastî der o. Labelê semedê reyê kurdan girewtene ra Kiliçdaroglu kerd namzetê serokqomî. Kiliçdaroglu çixaş ke qebul mekero, hem kurd hem kî elewî yo, no semed ra kerd namzet. Dide faşîstî leweyê î de kerdî destdar. Îmamoglu û Yavaş namzetê dewleta xorî yê. Çûnkê dewleta tirke xo newe ra dîzayn kena. No semed ra muxalefet û îqtîdar emway xo ser dizayn kenê. Yanî kes nîya mefikirîyo ke “Kiliçdaroglu êno kurd û şarê bindestî benê azad.” Şîyayîş û peyseramayîşê Akşenere no mezat pêrodayîş bî. Destê Akşenere ra roter da Kiliçdaroglu. Kiliçtaroglu vîdeoyê “elewî û kurdî’’ bê xebera dewleta xorî  nêviraşt. Kiliçdaroglu hata nika xo kerd her kes, tenya elewî û kurd nêbî. Se bî ke Kiliçtaroglu desin de bî elewî û kurd. Gerçî hina xo kurd nêvîneno, labelê stratejî de xo kurd musneno. Bî serokê CHPyî nêbî, waxt ra no waxt xirabîyê ke Erdoganî ardî Kurdan ser rizalixîya Kiliçdaroglu tede bîye. “Qanûnî rê çewt o, la ma heya vanîmê’’ va, Erdoganî re pişt vecîya û Demîrtaş tepîşt zîndan. Leşker erşawitişê Rojava û Başurê Kurdîstanî pêro razîbîyayena Kiliçdaroglu ra bî. Nika kî Kiliçdaroglu kurdan ra rey wazeno, la nê rozo de çendayê çend rojnamevan, avuqat û înanê ke asayîşê weçînayîşî ser o kar kenê pêro tepîştî zindan. Kiliçdaroglu naye ser o yew çekuye nêvate. Na helalîye waştene nîya, her kesî rê demokrasî waştene nîya. Na tenya tirkanê sipîyo rê demokrasî waştena. Ma nika nêzanîmê dewleta tirke çi plan kerd o semedê kurdo rê, destê Kiliçdaroglu ra çi anê ma sare de. No ma rê nîşan dano ke vatenê Kiliçdaroglu pêro stratejîk ê, kare kerdena weçînayîşî ser a. Kes nî aqilê xo ra mevezo. Kayê dewleta tirke nêqedînê çûnkê. Yew deqe bifikîrîmê, Kiliçdaroglu çixaş baş beno bibo, o tenya yew kes o, yew kesî ra kî demokrasî awan nêbeno.

Zerrê na qilerîye de tenya sîyasetê pakî û eşkera HDP kena. Barê şarê ma nika tayîna giran o, ganî peroz pê şewe hewna mekewîmê kar bîkerîmê. Keye xo ra û kuçeyanê her kesî ra rey biwazîmê û bidîmê famkerdîş, no weçînayîş çenda muhîm o. Eke CHP û têkilîya CHP bi AKP kare kerd, tenya muxalefet Partîya Çep a Keske (Yeşîl Sol Partî) manena. Ma çixaş zêde parlamenteranê şaran bigîmê hande hêzin benîmê. Wînî kar bikerîmê ke axa seserre dewleta tirke ra bigîmê. Nika ra şima rê serkewtîş wazon.