Endamê Konseya Rayberdişî ya KCKyî Mustafa Karasuyî derheqê têkoşînê Ocalanî de qisey kerd û vat: “24 serrî yo vera Rayber Apoyî polîtîkaya şerê taybetî yena caardene, la na polîtîka hetê ey ra yena betalkerdene.”

Endamê Konseya Rayberdişî ya KCKyî Mustafa Karasuyî derheqê tecrîdê giranî yê serê Rayberê Şarê Kurdî Abdullah Ocalanî û şerê taybetî yê dewleta tirke de cewab da persanê ANFyî.

Karasuyî wina îfade kerd: “Eke vera kurdan û Têgêrayîşê Azadîye polîtîkaya zextî yena caardene, na vera Rayber Apoyî zî yena caardene. Nêzdîbîyayîşê înan ê vera Rayber Apoyî polîtîkaya înan a vera kurdan zî mojnena. Ganî verî na raştîye bêro famkerdene. Nika îqtîdar vera kurdan polîtîkaya qirkerdişî ano ca. Heme caardişî semedê qirkerdişî benê. Wazenê ke kurdan ercanê ci ra raqilnê, bikerê sey tirkan û Kurdistanî bikerê warê tirkan.

Karasuyî nê cumleyî ardî ziwan: “24 serrî yo vera Rayber Apoyî polîtîkaya şerê taybetî yena caardene, la na polîtîka hetê ey ra yena betalkerdene. Îmrali de têkoşîno tewr bimana û xurt yê tarîxî yeno dayene. Nika gerîla vera hêrişê îşxalî têkoşînê xurtî dano û şarê kurdî dormeyê nê têkoşînî de payan ser de yo. Îqtîdarê AKPyî tesîrê Rayber Apoyî yê serê şarê kurdî zano. Coka çiwext têkoşîn yeno xurtkerdene cade xeberanê sey pêvînayîşê Rayber Apoyî vila keno. Wazeno ke wina têkoşînî sist bikero.”

Karasuyî qiseykerdişê xo rê wina dewam kerd: “Goreyê şerê taybetî çend serran mîyan de ge ge pêvînayîş yeno kerdene. Beno ke reyna bibo. Ganî no xelet nêro famkerdene. Tecrîdo giran esto ke teyna kurdî nê, hêzê demokratîkî yê mîyanneteweyîyî zî vera nê vejîyenê. Dewleta tirke yena teşhîrkerdene. Coka ma nêeşkenê vajê do pêvînayîş mero kerdene. Eke menfeatê ci şerê taybetî rê bibo beno ke pêvînayîş bêro kerdene. Ganî no sey gama hole nêro famkerdene. Xora verî zî prosesê çareserî nêbî. Îqtîdarê AKPyî waşt wext qezenc bikero, îqtîdarê xo zixm û têkoşînê azadîye sist bikero. Rayberê Şarê Kurdî zî waşt hêzanê demokrasîyî hêzdar bikero û şaranê Tirkîya çareserî rê amade bikero.”