Rejîmê Erdoganî raya kemalîstan teqîp keno û vera kurdan polîtîkaya zordeste rayra beno. Hetêk ra partîya kurdan ser o teda keno, hetekê bînî ra hêrişê ziwan û toreyan keno. Çend rojî ra ver Mehkemeya Qanûnê Bingeyî (MQB) bire daye û hesabê HDPyî yê hetkarîya xezîne bloke kerd. MQB na bire binê serdestîya seraya Erdoganî de daye. Hukm êdî sey esparî xizmetê Erdoganî keno. MQB kewto virara rejîmê dizdan.
Erdogan wazeno sey “procrustesî” kurdan û dormeyanê demokratîkan bigêro binê bandora xo. Hetêk ra kurdan rê warê sîyasî pêşnîyaz keno, hetekê bînî ra ê warî qedexe keno. Kurdî şaredaranê xo weçînenê, la ê şaredarî weçînitişî ra dima tepişîyenê û herinda înan qeyûmî yenê tayînkerdene. Kurdî partîya xo ronenê, a partîye nêzdî 10 mîlyonî rayan gêna. Labelê hukmo tirk hetkarîya xezîne birneno. Yanî kurdan rê têna “bendeyîye” pêşnîyaz bena. Verê cû wezîrê edaletî yo kemalîst Mahmut Esad Bozkurtî vatbî “ê ke tirk nîyê, têna wayîrê heqê bendebîyayîşî yê.”
Mêrdîn de derbkerdiş
Qezaya Nisêbînî ya Mêrdînî de 2 ciwanê kurdî hetê polîsanê tirkan ra ameyî derbkerdene. Domanan kincê tradîsyonelî kerdî pay û şîyî şewa hineyî. Badê ke ê agêrayî, bi destê polîsan ameyî vindarnayene. Seba ke kincê tradîsyonelî kerdî pay, polîsan dest pê derbkerdişî kerd. Înan pê girmikan û paşkulan domanî derb kerdî. Ci rê kifirê xirabî vatî. Bitaybetî kincanê tradîsyonelan rê kifirî kerdî.
Hêrişê vera Ferhat Encuyî
Vera kurdan terorê polîsî sînor nêşinasneno. Wina asîyeno ke Wezîrîya Karanê Zerreyî ya Tirkîya fermano taybet dayo polîsan ke vera kurdan şîdet bişuxilnê. Xora çend hewteyan verî polîsê tirkî hêrişê Hemserekê HDPyî yê Stenbolî Ferhat Encuyî kerd. Bado Hemserekê Pêroyî yê HDPyî Mîthat Sancar û tayê parlamentaran waşt nê reftarê polîsî protesto bikerê, ê zî ameyî astengkerdene.
Konserê MKMyî qedexe bî
Polîtîkaya hukmatê Erdoganî ya zordeste warê kulturî de zî yena caardene. Çend reyî konserî qedexe bîyî. Tewr peynîye 17ê kanûna 2022yî de Merkezê Kulturî yê Mezopotamya (MKM) waşt Kuçukçekmece de Merkezê Nawnayîşî yê Yahya Kemal Beyatli de konserê bi nameyî “Em ê Bêjin (Ma do vajê)” bido. Labelê Qaymeqamîya Kuçukçekmece destûr nêda. Aye eşkera kerd ke konser “pergala umumî û asayîşê pêroyî” xeripneno.