Di 18’ê kanûnê de li seranserê Iraqê ji bo hilbijartina 175 kursiyan Hilbijartina Meclîsa Bajaran pêk hat. Di hilbijartinan de partiyên kurd li herêmên binîqaş ên Herêma Kurdistanê hejmarek kursî bi dest xistin. Li gorî encamên fermî yên Komîseriya Serbixwe ya Hilbijartinê ya Iraqê, YNK li Kerkûkê bi 5 kursiyan bû partiya yekemîn. PDK’ê jî li Kerkûkê 2 kursî bi dest xistin. Li Mûsilê jî PDK’ê 4 kursî YNK’ê jî 2 kursî bi dest xistin. Li Selhedînê PDK’ê 2 kursî û li Diyalayê jî YNK’ê kursiyek bi dest xist.
Şengal a li herêma Nînovayê (Mûsil) jî yek ji navendên giştî yên hilbijartinê bû. Li Şengalê, namzetê Rêveberiya Xweser a Şengalê Qasim Keçko bi ser ket û mafê ku di Meclîsa Nînovayê de cih bigire girt. PDK tevî ku gelek namzet ji êzidiyan nîşan da jî bi ser neket û berovajiyê Hilbijartinên Giştî yên Iraqê nikaribû di vê hilbijartinê de tu nûnerekî êzidî li ser navê xwe bişîne Meclîsa Nînovayê.
30 hezar kes deng dan
Rojnameger Îbrahîm Êzidî ku hilbijartinan ji nêz de şopand, der barê encamên hilbijartinê û rewşa Şengalê de ji rojnameya me re axivî. Îbrahîm Êzidî, diyar kir ku çavê herkesî li Kerkûk û Mûsilê bûye û wiha got: “Li her du parêzgehan jî pirsgirêk û nakokiyên cidî yên siyasî û civakî hene. Ji van herêman yek ji cihê ku divê mirov li serê rawest e Şengal e. Li ser Şengalê mijara mirov bidin pêş PDK ye. PDK’ê koçberên êzidî di nav kampan de dîl girtine û rê nade ku vegerin ser cih û warên xwe.”
Êzidî, destnîşan kir ku PDK’a ku ji Şengalê reviya û êzidî radestî çeteyên DAIŞ’ê kiriye êzidiyên rizgar bûne di nava kampan de ji bo berjwendiyên xwe bi kar tîne û ev tişt anîn ziman: “Ev siyaseta PDK’ê ya li ser êzidiyan di van hilbijartina de hê bêtir derket holê. Di nava kampan de 54 hezar kes mafê wan ê dengdanê hebû lê ji ber ku vê hejmara nikaribû bi azadî biçe ser sindoqa û dengê xwe bide tenê 30 hezar kes çûn ser sindoqan.”
Bi ser neket
Ji bo encamên dengê şengaliyan Êzidî, da zanîn ku piraniya dengên xelkê Şengalê ku di nav kampan de di bin zextên PDK’ê de dane bûç bûne û ev nirxandin kirin: “Ev tê wê wateyê kku wan bi xwe dengê xwe şewitandine. Ev jî wê dide diyakirin ku êzidî naxwazin dengê xwe bidin PDK’ê. Lê tevî vê yekê jî PDK’ê ji ber ku gelek kesên êzidî kirin namzet 25 hezar dengên êzidiyan ji hev belav kir. PDK’ê dengên êzidiyan birin lê tu namzetekî êzidî bi ser nexist. Xuya dibe ku PDK’ê di van hilbijartina de siyasetek nû kiriye meriyetê û dixwaze bibêje ‘Eger ez sernekevim bila aliyên din jî sernekevin’.”
Êzidî, bi lêv kir ku siyaseta tifaqê û pêngava yekitiya gelan li Şengalê bi serketiye û wiha got: “Rêveberiya Xweser a Şengalê ji bo mîsogerkirina xweseriya Şengalê û diyarkirina çarenûsa xwe nêzî hilbijartinê bû û ji bo bigihije serkeftinê berê xwe da pêşxistina tifaq û yekitiya hêz û aliyên siyasî yên Şengalê. Li ser vê esasê di havîna 2023’yan de bi beşdariya PADÊ, YNK, Teqedûm û nûnerên pêkhateyên Şengalê, Koordînasyona Hêz û Pêkhateyên Şengalê hat ragihandin. Ev tifaq bêguman ne tenê bi armanca hilbijartinan bû lê zemîneke xurt a siyasî û civakî ji bo hilbijartinan jî ava kir.”
Derba li PDK’ê
Di berdewamê de Êzidî, destnîşan kir ku li ser esasê pêşxistina tifaqan namzetên PADÊ bi ser lîsteya Yekîtiya Gelên Nînowayê beşdarî hilbijartinê bûne û der barê encama derket holê de ev nirxandin kirin: “Rêveberiya Xweser bi vê xebatê nûnerê xwe yê rasteqîn şand parêzgeha Mûsilê. Em dikarin bibêjin ku di dîroka êzidiyan de ev cara yekemîne nûnerê xelkê Şengalê yê rasteqîn wê biçe Meclisa Parêzgehan. Di van hilbijartinan de derba herî mezin PDK’ê xwar. Di van hilbijartinan de derket holê ku xwediyê Şengalê kî ne. Qasim Keçko bi dengê hemû pêkhateyên Şengalê hatiya hilbijartin û bûye nûnerê tekoşîn û berxwedana li hemberî DAIŞ’ê.”
