6ê sibata 2023yî de çimê heme dinya di erdlerzê ke Mereş de qewimîyayî de bîyî. Merkezê ci qezaya Bazarcixî ya Mereşî de şewe saetê 04.17î de erdlerzêko gird qewimîya û dimayê 9 saetan yê erdlerzê yewinî saete 13.24î de erdlerzêko bîn qewimîya. Girdîya erdlerzê yewinî 7,8 û yê diyîne zî 7,6 bîye. Erdlerzî 11 bajaranê sey Mereş, Hatay, Edene, Semsûr, Amed, Dîlok, Riha, Xarpêt, Osmanîye û Kîlîsî de bî sebebê texrîbatêkê girdî yê madî û manewî. Mereş de hema hema awanîyêka saxleme nêmende û goreyê dayeyan tena eno bajar de 12 hezar û 713 tenan dinyaya xo vînî kerde. Hûmara awanîyanê ke rijîyayî zî 15 hezar û 940 bîye û yê xisarinan 19 hezar û 194 bîye. Qezaya Dulkadîroglu ya Mereşî de hezar û 187, qezaya Turkogluyî de 770, Bazarcix de 582, Onîkîşubatî de 483 û Elbîstan de 468 awanîyî rijîyayî.
Derheqê babete de endama PMyî ya DEM Partî Hulya Kavuka ke mîyanê heyetî de ca gêna, qisey kerd. Kavuke destpêkerdişê qiseykerdişê xo de vat: “Ez hatayij a. Erdlerzî ra ver zî Hatay de bîya û nika zî Hatay de ciwîyena. Hewteyanê ewilinan de ma xeylê zehmetîyî antî. Merdimê ma verê çimanê ma de bi qîre qîr merdî. Çi heyfo ke ma mergê înan temaşe kerd. Bi rojan hetkarî nêresaye tîya. Ne yew kepçe est bî û ne zî seba mudaxalekerdişê xirban wesayîtêk estbî. Dima ra her cayê Tirkîya ra zerrîwaştoxî ameyî hetkarîya şarê Hatayî. Hewteyê yewinî awe ra heta weyebîyayîşî, varan ra heta qeşagirewtişî ma xeylê çîyî dî. Tîya de bi paştîdayîşê zerrîwaştoxan ke her cayê dinya ra ameybî tora rêxistinbîyayîşî ame awankerdiş. Ma hetkarî yê ke ameyî ber bi ber vila kerdî. Problemo yewin starbîyayîş bî. Xeyme bibayêne zî soba çinîbî. Malzemeyê hîjyenî çinîbî. Koordînasyonê ke bi paştîdayîşê zerrîwaştoxan taxan de ameyî awankerdiş problem ameyêne derbazkerdiş.”
Kavuke bale ante serê bêîxmalîya de ameye kerdiş û wina vat: “Dewlete a roje zî çinîbî. Serê ci ra yew serre derbaz bîye la hema zî çinî yo. Hema zî kuçeyî mîyanê lince de yî. Hema zî şar kuçeyan de xeyman de ciwîyeno. Cayê starbîyayîşî nêdîyeno şarî. Bajarê konteynirî yê ke ameyî awankerdiş de zî xeylê problemî yenê ciwîyayîş. Heta kesê ke cereyan ra merdî estî.”
Kavuke qala rewşa cinîyan û ekonomîya bajarî zî kerde û vat: “Hetê cinîyan ra rewşêka xofe est a. Yew serre yo ke heme bar serê milê cinîyan de yo. Betalî girewto sereyê xo şino. Ameyoxê kesêkî çinî yo. Hema zî cuye nêbîya normal. Hetê Walîtî û AFADî ra çend sûkê şenikî ameyî awankerdiş. Înan ra vîşêr tu çîyêk çinî yo. Hêzê herînayîşî çinî yo. Yew serre derbaz bîye la dewlete hema zî yew mekteb nêviraşta. Çi heyfo ke mektebê ke saxlem mendî zî sey dezgehê pêroyî yenê şixulnayîş. Awanîyê saxlemî ameyî dagirkerdiş. Nêweşxaneyê ma yê serûberî çinî yî. Hema zî problemê krîtîkî yenê ciwîyayîş û şar seba weşîye şino Edene, ya zî şino Dîlok. Hema zî problemê weşî û perwerdeyî est o. Hêvîya şarê Hatayî dewlete û îqtîdarî ra çinî ya.”
Kavuke tewr peynî vist vîr ke do 6ê sibate de DEM Partî kombîyayîşê xo yê hewtane seba yadkerdişê mexduranê erdlerzî Hatay de bikero û vat: “Xeylê cayanê Hatayî de do yadkerdiş bêro organîzekerdiş. Bi platformêko hîrayî xebate yena kerdiş. Ma platformê 6ê sibate awan kerd. Mîyanê ci de odeya meslekî, partîyê sîyasî, sendîka û komeleyê paştîdayîşê erdlerzî est ê. Partîya ma do kombîyayîşê xo yê hewtane yê meclîsî no hewte Hatay de bikero. Qet tîya de yeno kerdiş? Partîya ma rojanê ewilinan ra nata hem meclîs, hem zî kuçe de hewl da ke biba vengê mexduranê erdlerzî. Serrgêra yewine ya erdlerzî de hema zî eynî problemî yenê ciwîyayîş. Coka ra partîya ma qerarêko winasî da. Heme hemserekê ma do tewrê vîrardişan bibî. Partîya ma vengê înan a.”
