Hemserekê DBPyî Keskîn Bayindirî arz ziwan ke ê do faşîzmî bin bivisnê û wina qisey kerd: “Ma do sey vizêrî ameyox de zî serkêşîya têkoşînê vera faşîzmî bikerê. Mifteyê têkoşînê demokratîkî destê kurdan de yo.”
Bayindirî bale ante tesîrê meseleyanê bingeyînan ê netîceyanê weçînayîşî ser û vat: “Ganî her kes na raştîye bivîno ke rixmo ke dewlete pêro îmkanê xo seferber kerdî şarê kurdî faşîzmê AKP-MHPyî vindarna û rejîmê Erdoganî tesdîq nêkerd. Coka şaş o ke netîceyê weçînayîşî sey binkewtişêkî bêrê ercnayene. Aseno ke netîceyî serkewte nîyê la ma bin nêkewtê zî. Ganî destûr nêro dîyene ke atmosfero ke îqtîdarî afernayo, moral û motîvasyonê ma çin bikero. Ganî ma tewirê şarê kurdî hol tesbît bikerê. Netîceyê sîyasî û komelkî yê weçînayîşan bingeyê têkoşînê vera faşîzmî de do bêrê dîyarkerdene.”
Bayindirî ard ziwan ke vera faşîzmê AKP-MHPyî ganî sîyasetê Kurdistanî biamayêne pîlkerdene la gamanê şaşan ra no nêbî. Bayindirî pare kerd ke krîterê komelbîyayîşî yê sîyasetî, parlamenterîzmê merkezî û dafikan ra ê nêeşkayê faşîzmî wedarnê. Bayindirî vist vîrî ke vera HDPyî dewaya kumpase ya Kobanê û hêrişî est bîyê coka înan waşt ke şarî bêalternatîfî nêverdê. Bayindirî vat: “Dewlete rayê kurdan diznayê. Coka ganî netîceyê weçînayîşan sey meşrûyî nêrê dîyene.”
Bayindirî îfade kerd ke HDP partîyêka îtîfaqî ya û Îtîfaqê Kede û Azadîye û Îtîfaqê Demokrasî û Azadîye yê Kurdan teyna îtîfaqê weçînayîşî nîyê. Bayindirî vat: “Ma bi lîsteya yewe tewrê weçînayîşî nêbîyê zî ganî ma bieşkayêne sînerjîyêke biafernê. Sîyasetê îtîfaqî pratîk de hol nêame caardene, krîzî nêameyî çareserkerdene. Wexto ke netîceyê weçînayîşî serkewte nêbîyê hacetê şerê taybetî kewtî dewre û bi qiseyan îtîfaq xirab ame mojnayene. Ma nê şiroveyan red kenê. Ma do dewrê neweyî de îtîfaqê xo pîlêr bikerê û faşîzmî bin bivisnê. Ma do sey vizêrî ameyox de zî serkêşîya têkoşînê vera faşîzmî bikerê. Mifteyê têkoşînê demokratîkî destê kurdan de yo.”
