Şaro Kurd, roşanê newerabîyişî Newroze, Newroza 52’ine ya Rayvertîye firaz keno. Dîmenêy ke di Newroza 2024’ine de vecîyay orte, nîşaneyê pêvajoyêka newîye yê. Êrîşêy dewleta Tirke êy verva şarê Kurdî, her wext bi mexsedê qirkerdiş, çinêkerdiş û bi temamî orterawedartişî bîy. Her ke tekoşîne û xoverdêrîya şarê Kurdî pile bî, êrîşê qirkerdişîy zî giran û verhîra bîy. Tekoşîne şerr giran kerd, şerî tekoşîne pile û verhîra kerde. Di kêlîya ke ma tedeyê de binamekerdişê Rayver Apoyî yê “Şaro Kurd şarê Newroze yo”, dorêka bîne ameye îspatkerdene.
Newroza emserî, coşa meşê azadîye yê Vakûrê Kurdistanî û tekoşîna 8’ê Adare ya cenîyan, bi hemleya 10’ê Citmenge ya Mîyanetewî ya “Rayver Abdullah Ocalanî rê Azadî, Persgiraya Kurde rê Çareserîye” reyde gire da. Seranserê Kurdistanî, metropolanê Tirkîya, Ewropa û tewir peynî Amede de meydanîy bi “Bicuwîyo Serok Apo, Rayver Apoyî rê Azadîye”, lerzay.
Dewleta Tirke, di şexsê rejîmê AKP-MHP’yî de serra 2015’ine ra verva şarê Kurdî konseptêko newe da destpêkerdiş. Di ney konseptê xo de konjektorê dinya û nakokîyê hêzêy hegemonan bi kar ardîy. Efrîn nêy nakokîyan sero ame îşgalkerdene. Bi şerrê maberê Rûsîya û Ukrayna, verva gêrîllayanê azadîye îmkanê bikarardişê sîlahêy kîmyewî, taktîk-nukleer û bombeyê qedexeyan, da dewleta Tirke. Bi şerrê Îsraîl û Hamasî, dorêka bîne êrîşê verva Rojavayî, Vakûr-Rochelatê Sûrîya amey destpêkerdene. Di nêy maberî de teknîkê SÎHA yan bi dest vist û Heremanê Pawitişî êy Medya ra Rojava, Mexmûre ra Şengale, bi nêy SÎHA yan xeylê qetlîamî pêk ardîy.
Rixmê nêy heminan zî nê şika vernîye ro Şoreşa Vakûr-Rochelatê Sûrîya bigero, nê şika gêrîllayî têk bero û nê zî şika tekoşîna şarê Kurdî bido vindarnayene. Şoreşa Vakûr-Rochelatê Sûrîya, roc bi roce aver kewte. Gêrîllayanê azadîye rixme heme teknîkê şerrî, derrbêy giranîy ro artêşa Tirke day. Operasîyonanê gêrîllayan êy aşmanê Çele û Sibata 2024’ine dewleta Tirke lerznaye. Yewîn dore di çapemenî û sîyasetê Tirkîya de rewşa têkşîyî ya artêşe, amî nîqaşkerdene.
Operasîyonê Şoreşgerîye êy Gêrîllayanê Azadîye dewam kenê. 19’ê Adare gêrîllayanê azadîye operasîyonêko bîn pêk ard û 41 îşgalkerîy amey cezakerdiş. Bi sebebê Newroze û xebatanê weçînayişî na derrbe di raya pêroyî de zaf ca nêgirot.
Pergala terîdî ya verva Rayverê Şarê Kurdî zî nêresa mexsedê xo. Pergala Tecrîdî bi mexsedê qutkerdişê têkilîyan û birrnayişê vengê Rayvertîye, amî avervistene. La verapeyê naye, bi tekoşîna şarê Kurdî Rayver Apo zafêrî gerdûnî bi. Ewro di qada akademîke, entellektuel û sîyasî ya dinya de felsefe û paradîgmaya Rayvertîye zê alternatîfê verva Modernîteya Kapîtalîste yena nîqaşkerdene. Emrîkaya Latîne ra heta Efxanîstan û Rochelatê Mîyanênî şarêy dinya ro Rayvertîye wayir vecîyenê û paradîgmaya ey zê xelasîya xo vînenê.
Dewleta tirke, di şerrê verva Gêrîllayanê Azadîye de paştîya xo bi ÎHA û SÎHA’yan gire dabi. Xisûsî SÎHA’y di şerran de sîlahêy tewir kêramey êy sûîqastan û îmhakerdişî yê. Xora di destê dewletanê zê Emrîka Rûsîya, Îsraîl û Çînî, ke di teknolojîyê amûranê şerrî de aver kewtê de est ê. Nêy dewletîy, seba serdestîya xo ya di şerran de lezalez nînan nêroşenê zî. Zê nimûneyî Azerbaycanî bi nêy SÎHA’yanê ke dewleta Tirke ra girotîy, di mîyanê çend rocan de artêşa Ermenîstanî têk berde.
Bi qasê SÎHA’yan, tu amûrêkê şerrî êy dewleta Tirke zirar nêda gêrîllayî. Bi nêy teyarreyê qatilan, Heremanê Pawitişî êy Medya ra heta Şengale, Mexmûr û Rojavayî xeylê verkêş, kadro, lejwan û sivîlîy amey qetilkerdene.
Têgêrayişê Azadîya Kurdistanî bi mijdîyanîyêke eşkera kerd ke, pergala fuzeyanê verva SÎHA yan bi dest vista. Na mijdîyanîyêka zaf muhîme û tarîxî ya. Zê Têgêrayişêke bidestvistişê ney fuzeyan ke amûrêy tewir kêramey êy dewletêy hegemonan ê, bi serreyê xo serkewtinêko pîl o. Na mijdîyanîye do di şerrê verva îşgalkerîye de biba binkeya qunaxêkê neweyî. Xora tesîrê naye di firazkerdişê gêrîllayan êy koyanê Kurdistanî de zî xo nîşan da. Bi seyan gêrîllayan Heremanê Pawitişî êy Medya de bi merasîmanê girseyîyan, Newroze firaz kerde. Bidestvistişê nêy fuzeyan, do di şerrê verva îşgalkerîye û ardişê raye yê dewleta Tirke de, rolêko pîl kaye bikero.
