Paradîgmaya Serekê PKKyî Abdullah Ocalanî pêro dinya de her roje tesîrê xo zêdînena. Xeylêk welatan de akademîsyen, aktîvîst, sîyasetmedar, doktor ûsn. teorîyanê Ocalanî musenê û formule kenê. Nê kesan ra akademîsyen û aktîvîst, heman wext de Hemmudirê Merkezê Cigêrayîşan ê Kurdî Dr. Thoreau Redcrowî rojnameyê ma rê tayê ercnayîşî kerdî.
Akademîsyen û aktîvist Dr. Thoreau Redcrowî ard ziwan ke o xeylê wexto meseleya kurdan ser o xebatan keno û wina qisey kerd: “Ez Amerîka de wareyê neteweyanê bêdewletan de bîya pispor. Xebatanê kurdan ser o analîzan kena. Hema hema mi heme bakur, başûr, rojhelat û rojawan ziyaret kerdî. Mi 10 serrê xo yê peyênî bi xebatanê ke babeta ci Kurdistan o derbaz kerdî. Nê xebatê mi xeylê welatanê sey DYA, Almanya, Swîs, Hollanda, Belçîka, Kralîyeto Yewbîyaye ûsn. de bi tewrbîyayîşê mîtîng, protesto, bernameyê TVyan, nuştiş, tewrbîyayîşê konferansan qewimîyenê. Na babete ez bena Konseya Heqanê Merdiman a Neteweyanê Yewbîyayeyan û Parlamentoyê Ewropa zî.”
Dr. Thoreau Redcrowî qala konfederalîzmê demokratî zî kerd û vat: “Konfederalîzmo demokratîk netîceya cehdkerdişê serran ê pratîk û teorîk o û sînorê negatîfî raşte ra wedarneno. Sentezêko felsefî yo zaf ercaye yo. Konfederalîzmo demokratîk xeylê probleman rê beno çareserî. Hêzê Ewropa semedo ke nifusê şaran bigêrê binê kontrolê xo, sînoranê neteweyî xêz kenê. La çîyo ke konfederalîzmo demokratîk keno, sînoran raşte ra wedarneno û şanso ke şar bi îradeyê xo xo îdare bikero û cuya xo îdame bikero, aver beno. Semedo ke herra kurdan hetê Tirkîya, Îran, Iraq û Sûrîye ra ameya dagirkerdiş, no model seba tewrbîyayîşê înan ê demokratîkî û xo rayîraberdişo ke hetê nê dewletan ra ameyo astengkerdiş, bîyo laboratuwarêko zaf baş. Fikrê Ocalanî vera krîzê îklîmî zî rayîr nîşanê ma dano. Eynî wext de azadîya cinîyan û garantîya azadîya cuya înan pêşkêş keno. Kurd babeta têkoşînê azadîye de zî ez bawer kena ke ewro şerêkê dinya yê tewr heybetinî aver beno. Ez firtineyê Bastille (1789) û firtineyê Qesrê Zimistanî (1917) mîyanê komastereyan de sey astereyêkî vînena. Ez raşteyê Sûrî yê verênî (2015) sey Komunê Parîsî (1871), molozê Kobanê (2014) sey Stalîngrad (1942) û koyê Zagrosî ke hetê gerîlayan ra yeno pawitiş sey Şerê Zerreyîn ê Spanya (1936), sey Barselonayêka bîne vînena. Merdimê ke bawer kenê rê vileçewtkerdiş mergî ra xirabêr o.”
Tepiştişê Ocalanî ‘îşkence’ yo
Redcrowî derheqê tecrîdkerdişê Ocalanî de zî qisey kerd û wina ercna: “Dewleta tirke û rejîmê Erdoganî vera Ocalanî tecrîdêkê bêhuqûqî aver bena. Nê raybazî sey şerêkê psîkolojîkî vera kurdan ana ca. Bi tenaverdayîşê Ocalanî bawer kena ke do îradeyê 20 mîlyon kurdanê Bakurê Kurdistanî bişikno. Wexto ke dînamîkê muxalîfî vera îdareyê dîktatoran bivejîyo, dîktator cehd keno ke înan raşte ra wedarno. Dewleta tirke û Erdogan zî derheqê rewşe û weşîya Ocalanî de malumat nêdanî û wazenê mîyanê kurdan de şîzofrenîyêkê kolektîfî û bêasayîş aver bifînî. Semedo ke Anqara nêeşkena xoverdayîşê gerîlayanê PKKyî birijna, aciz bena û Ocalanî binê tecrîdî de verdena. Vanê ma nêeşkenê şima çinî bikerî la ma eşkenê serekê şima ke nika rehîn o ser de ezîyet bikerî. Tîya de keso ke bêexlaqîye keno tebîî dewleta tirke ya. Xeylê hemkarê nê sucî est ê. Sere de zî hemkarîya Tirkîya û NATOyî est a. NATO endamê xo ra hesab nêperseno. Ê tersenê û vanê ‘eke ma Tirkîya ra biwazî ke goreyê huqûqê mîyanneteweyî têbigêra, do Anqara bikewa binê bandora Rûsya ya jeopolîtîke.”
NATO peştî dano
Dr. Redcrowî qiseykerdişê xo de vat: “Dewleta tirke mabênê Washington û Moskova de pozîsyonêko xurt pawita. Her tim wirdî hetan hemverê yewbînan sûr kena û seke wirdî hetî zî hewcedarê yewbînan bî nîşan dana. La ganî nêro vîrkerdiş ke leşkerê tirkî yê cinawirî jet û helîkopteranê xo DYA ra, tankanê xo Almanya ra, fuzeyanê xo Îngilîstan ra, bombayanê xo Fransa ra, tifinganê xo Îtalya ra, topanê hewanî Îsrailî ra, teyareyanê bêmerdimî zî Kanada ra herînenê. Pereyê gonînî yê seba cebilxaneyan yenê qebûlkerdene. Zîndanê Îmraliyî ewnîyayîşê mîyanneteweyî rê ameyo girewtiş. Semedo ke dewleta tirke bi destê NATOyî ameya awankerdiş, dewletê NATOyî vengê xo nê sîstemî rê nêkenî. Eke Tirkîya seba peynîardişê şerî muzakereyan aver biba, do heme hetî destkewteyanê pîlan dest bifînî. Do rûmetê lîreyê tirkan zêde bibo. Do dewleta tirke nêkewo mîyanê fînansê şerî. Bi aştîye do bi mîlyonan dolar tasarruf bibo. Do Amed, Mêrdîn bibî merkezê turîzmî. Do zîndanî veng bibî. Tirkîya do êdî nêmana Afganistanî ke nika kontrolê Talîbanî de yo.”
Redcrowî tewr peynî bale ante serê Nobeta Edaletî û çalakîya Grevê Vêşanîye û wina vat: “Kesanê ke mecburî kewenê Grevê Vêşanîye rê ganî merdim hurmet nîşan bido. Bi taybetî ez seba kesanê ke zîndan de yî rê nê çîyî raşt nêvînena. Rewşa nikayîne de tu wijdanê dewleta tirke çinî yo. Raybazê zirardayîşê xo dişmenî rê feyde ano. Nê merdimî semedo ke vera dewleta tirke hîna aktîf xover bidî, ganî hetê weşîya xo de baldar bibî.”
