Koordînasyonê KJKyî qetilkerdişê parlamentere Mursel Nebîzade şermezar kerd û seba paştîdayîşî venga pêro cinîyan da.

Koordînasyonê KJKyî derheqê qetilkerdişê Nebîzade de eşkerayîyêka winayêne weşanaye:

“Xeylêk welatanê Rojhelatê Mîyanênî de ewro krîz û kaosî bîyê xorinî, cinîyî yenê qirkerdene. Na rewşe tewr zaf Afganîstan de yena dîyene. Afganîstan de Talîban keno ke îradeyê cinîyan binpay bikero. Cinîyê Afganîstanî her warî de hetê Talîbanî ra yenê qedexekerdene. Rêxistinê sey Talîban, DAÎŞ û El Qayîdeyî dişmenîya cinîyan kenê, her ca de polîtîkayanê qirkerdişê cinîyan kenê. Talîban verê çimanê pêro dinya de 2021 de îqtîdar vist destî.

Qetilkerdişê parlamentera verêne Mursel Nebîzade netîceyêka rejîmê barbarî ya. Rejîmê Talîbanî çend îdîa bikero zî kerdoxê nê cînayetî nîyo ma baş zanenê ke kerdox kam o. Sîstemê serdestîya camêrdan, îqtîdarperest û seksîstî sebeb û sûcdarê nê kerdişanê vera cinîyan ê. Nebîzade ê cinîyan ra yewe bîye ke îdareyê Talîbanî ra dima welat nêteriknabî.  Vera raştîya cinîyan sîstemê serdestîya camêrdan pê pêro hêzê xo yê îqtîdarî hêriş keno.”