Buroyê Huqûqî yê Asrinî seba ke CPT nêşîyo Îmraliyî nêrazîbîyayîş mojna û wina vat, ”Na rewşe mojnena ke îşkence û tecrîdê Îmraliyî do dewam bikero.”
Buroyê Huqûqî yê Asrinî derheqê zîyaretê peyênî yê CPTyî yê Tirkîya de eşkerayîye daye û nê pare kerdî:
“CPTyî eşkerayîya xo ya vizêrîne de da zanayene ke înan tarîxanê 13-24ê sibata 2024î de Tirkîya de tay zîndanî zîyaret kerdî. Mîyanê zîndananê ke ameyî zîyaretkerdene de nameyê Zîndanê Îmraliyî çîn o. Eşkerayîya CPTyî de yeno vatene ke înan derheqê rewşa Îmraliyî de zî pêvînayîşî kerdî.
Eşkerayîye ra yeno famkerdene ke heyetê CPTyî Zîndanê Îmraliyî zîyaret nêkerdo Birêz Abdullah Ocalan, Birêz Veysî Aktaş, Birêz Hamili Yildirim û Birêz Omer Konarî reyde pêvînayîş nêkerdo ke mîyanê sîstemê tecrîdê Îmraliyî de yê û 35 aşmî yo înan ra qet xeberêke nîna girewtene.
No nizdîbîyayîşê CPTyî goreyê qedexeyê îşkenceyî û vergirewtişê şertanê îşkenceyî nîyo. Muwekîlê ma bi serran o avûkatan û merdimanê xo nêvînenî. Înan ra qet xeberêke nîna girewtene. Bi hewayêkê sîstematîkî bîlasebeb cezayê dîsîplînî yenê dayene. Îmrali de heqê pawitişî bi temamî werte ra ameyo wedaritene.
Heyetê CPTyî rixmê şertanê giranan ê tecrîdî û bêhuqûqîya ke yena kerdene têna selahîyetdaran de pêvînayîş kerdo ke no nîno qebulkerdene. CPT bi xo zano ke Tirkîya qerarê ‘Ganî cade avûkatanê xo reyde pêvînayîş bikero’ yê Komîteya Heqanê Merdiman ê Yewîyanê Neteweyan serrêke û nîm o ke nêardo ca. Rixmê nê têna selahîyetdaranê dewlete de pêvînayîşkerdiş yeno na mana ke înan rewşa tepişteyan keyfê dewlete rê caverdayo.
Na rewşe mojnena ke îşkence û tecrîdê Îmraliyî do dewam bikero. Pawitişê ma CPTyî ra oyo ke wa tespît û çimdarîya xo yê Îmraliyî rayapêroyîye rê eşkera bikero. Seba ke pêvînayîşê keyeyî û avûkatan bêrê kerdene û ganî bi çimê dewlete meewnîyo, herinda naye de rolêkê aktîfî kay bikero.”
