Rêxistina Şopandina Mafên Mirovan, Projeya Piştgiriya li Dozên Mafên Mirovan ên Tirkiyeyê, Komîsyona Hiqûqnasan a Navneteweyî û Federasyona Mafên Mirovan a Navneteweyî bi wesîleya salvegera 7’an a girtina siyasetmedarên Kurd daxuyaniyek weşandin.

Di daxuyaniyê de ji hikumeta tirk hate xwestin ku li gorî hiqûqa navneteweyî tevbigere, biryarên Dadgeha Mafên Mirovan a Ewropayê bi cih bîne û hevserokên berê yên HDP’ê Selahattîn Demîrtaş û Fîgen Yuksekdag berde.

Di daxuyaniyê de her wiha pêvajoya dozê û biryara Dadgeha Mafên Mirovan a Ewropayê ya li ser binpêkirinê hate bibîrxistin.

Di daxuyaniyê de hate ragihandin ku hevserokên berê yên HDP’ê Selahattîn Demîrtaş û Fîgen Yuksekdag bi armancên siyasî hatine girtin û divê edalet bi cih bê anîn.

Dîrektorê Asya Navîn û Ewropayê ya Rêxistina Şopandina Mafên Mirovan Hûgh Wîllîamson anî ziman ku Tirkiye berpirsyariyên xwe yên di asta navneteweyî de bi cih nîne, bi rengekî dijî hiqûqê siyasetmedar girtiye û ev yek jî li pêşiya nîqaşkirina demokratîk astengî ye.

Dîrektorê demkî yê Bernameya Asya Navîn û Ewropayê ya Komîsyona Hiqûqnasan a Navneteweyî Temûr Shakîrov jî ragihand ku li gel biryarên Dadgeha Mafên Mirovan a Ewropayê jî Serdozgeriya Komarê ya Enqereyê daxwaza mehkûmiyeta sûcên têkildarî îfadeya siyasî kiriye û armanca dawî ya van dozan jî siyasî ye.

Alîkara Federasyona Mafên Mirovan a Navneteweyî Reyhan Yalçindag diyar kir ku dema girtina siyaetmedaran pêvajoya krîtîk a kampanyayê bû û ji Komîteya Wezîran û organên Konseya Ewropayê xwest ku ji bo bidawîkirina binpêkirina mafên mirovan bikevin nava liv û tevgerê.

Dîrektora Projeya Piştgiriya bi Dozên Mafên Mirovan a Tirkiyeyê Ayşe Bîngol Demîr jî destnîşan kir ku Tirkiye berpirsyariyên xwe yên navneteweyî bi cih nîne û ji Komîteya Wezîran xwest ku kontrolê zêde bike.