Rojnamegere Rûken Cemale pare kerd ke dewleta tirke qestî ra rojnamegeran kena hedef û wina qisey kerd: “Ganî sere de rojnamegerê kurdî pêro rojnamegerî paştî bidê ma.”

Rojnamegere Rûken Cemale ANFyî rê qala hêrişanê îşxalî yê vera dezgehanê çapemenîye û rojnamegeran kerde.

Rûken Cemale pare kerd ke Rojawanê Kurdistanî prosesêkê zehmetî ra derbaz beno û vat: “19ê teşrîna peyêne de dewleta tirke hêrişê herême kerd. Şewa verêne hêrişê vera Dêrikî de embazê ma yo rojnameger Îsam Ebdullah û 10 kesê bînî şehîd bîyî. Embazê ma yo rojnameger Mihemed Cerada zî wexto ke xeberî teqîb kerdêne Girê Miştenûrî yê Kobanê de dirbetin bî. Şerê Serêkanîyê û Girê Sipî de zî rojnamegerî bîyî hedef. Dewleta tirke seba ke vengê raştîyan bibirna qestî ra rojnamegeran kena hedef. 2019 de Girê Sipî de embazê ma Dilovan Gever zî karwanê şehîdan bîbî.”

Rûken Cemale îfade kerd ke ê binê şertanê giranan de weşangerî û rojnamegerîye kenê û vat: “Ma serê rêçê nê embazanê xo yê şehîdan do xo ver bidê û raştîyan biresnê şarî. Ma bi nê hawayî wayîrê mîrasê şehîdan vejîyê. Ewro xoverdayîşê Rojawanî xoverdayîşo neteweyî yo. Ganî sere de rojnamegerê kurdî pêro rojnamegerî paştî bidê ma. Ganî rojnamegerê kurdî bi mesuldarî û hesasîyetî têbigêrê.

Yeno vatene ke dewleta tirke erdî ra zî hêrişê Rojawanî bikera. Sey rojnamegeranê Rojawanî ma nê warî de xo amade kenê. Ma raştê hêrişanê hîna çetinan bêrê û şehîd bibê zî seba resnayîşê raştîyan destê ma ra çi bêro bikerê. Nê esasî ser o sere de ê kurdan ma venga pêro dezgeh û rêxistinanê çapemenîye danê ke ‘pawitişê çîyanê ke tîya de qewimîyenê, pawitişê rûmetê merdimîye yo.’ Seba vergirewtişê qirkerdişanê neweyan ganî rojnamegerî bi mesuldarî têbigêrê.”