Endama Cinîyî Pîya Jîhat ê Ruya Kurtuluşe derheqê destbendkerdişê Semra Guzele de wina vat: “Guzele destûr nêda ê milê aye çewt bikerê û cewabo tewr bitesîr da.”

Parlamentera HDPyî Semra Guzele gama ke ameye destbendkerdene polîsan kerd ke milê ci çewt bikerê la Guzele sereyê xo nê ard war. Endama Cinîyî Pîya Jîhat ê Ruya Kurtuluşe derheqê babete dir ANFyî rê qisey kerd.

Kurtuluşe wina vat: “Vera Guzele hêrişo dişmenkî ame kerdene. Hêrişêko cînsî û nîjadperest dîya destpêkerdene. Nasnameyê ci yê cinî û kurdî rê hêriş ame kerdene. Semedê wedaritişê destnêpadayîşê ci tay parlamenteranê muxalefetî zî paştî da û Guzele ameye destbendkerdene.”

Kurtuluşe derheqê tewirê dewlete de wina qisey kerd: “Wezîrê Karanê Zereyî yê welatî pîya bi kiştoxan fotografan vejeno. Ma pêro şahid ê. La muameleyo ke yew parlamentera cinî, Semra Guzele rê bî, ma naye rê zî bîyî şahid û ma do çirey xo vîr ra mekerê. Ame waştene ke mesajêk bidîyo cinîyan, kurdan û komelî. La Guzele destûr nêda ê milê aye çewt bikerê û cewabo tewr bitesîr da. Ma cinîyan çirey verê zextê AKPyî de peyser game nêeşte û ma do çirey zî meerzê.”

Ruya Kurtuluşe qiseykerdişê xo rê wina dewam kerd: “Îqtîdar vera cinîyan polîtîkayêka sîstematîke rayra beno. Meclîs û şaredarîyan de tim estbîyayîşê cinîyan ame astengkerdene. Rewşa winayêne de têgêrayîşê cinîyan ê kurdan û HDPyî reyde berêk ame kerdene. Reya verên a ke meclîs de hende cinî estê. La bi hawayêkê sîstematîkî vera cinîyan hêriş yeno kerdene. Parlamenterîyî ameyî wardayene û sîyasetmedarê cinîyî ameyî tepiştene.”