Vervatoxa HDPyî Ebru Gunaye îtîfaqê bînî rexne kerdî û wina vat: “Îtîfaqê ma îtîfaqê rayîrê hîrêyinî yo, îtîfaqê kede û demokrasî yo.”

Vervatoxa HDPyî merkezê pêroyî yê partîya xo de kombîyayîşê çapemenîye kerd û rojdem ercna.

Gunaye vat ke îqtîdar pê polîtîkayanê xo yê îtîhatçîyan, pê têkilîya xo ya hêzanê tarîyan û mafya wazeno rejîmê tekcamêrdî mende bikero û wina qisey kerd: “Îqtîdar seba ke ser bikewo pêro pîsîyan keno. Îtîfaqê Mîletî zî mîyanê nîqaşanê namzetîya serekkomarîye de teng bîyo. Yew plan û projeyê înan çin o. Ma têna erşawitişê Erdoganî derd nêkenê. Derdê ma caardişê demokrasî yo. Ez wazena tay nîqaşan safî bikera; ma qet yew partîye de bazarî nêkerde û nêkerê. Şar pê rayanê xo ma do biweçîno. Şar do ma bîyaro û ma zî do waştişanê şarî bîyarê ca.

Gunaye derheqê îtîfaqan de wina vat: “Zanîyeno ke ma kamyew masa de yê. Wina yeno mojnayene ke seke HDP wazeno mîyanê Îtîfaqê Mîletî de cabigêro. Ma ne mîyanê Îtîfaqê Cumhurî de yê ne zî mîyanê Îtîfaqê Mîletî de yê ne zî ma paştî danê înan. Ma do Îtîfaqê Demokrasî reyde şorê weçînayîşan. Ma bi zelalî vanê ke ma do qetî paştî nêdanê namzetêkî/e ke goreyê ma nîyo/a. Ma partîya tewr pîle ya hîrêyine ya. Wexto ke şima qala partîya ma kenê hedê xo bizanê. Eke wina nêbo şima do bedelanê pîlan bidê. Gureyê Meral Akşenere nîyo ke cayê HDPyî dîyar bikera. Ma aye gureyanê ci yê tarîyan ra şinasnenê. A tena tarîtîya 90an wead kena. Gureyê HDPyî masaya to de çin o. Îtîfaqê ma îtîfaqê rayîrê hîrêyinî yo, îtîfaqê kede û demokrasî yo.”