Vîzerî de mefinde tepîya manena

Meşte de mecuwî dinya xeyal de manena

Ewro de bicuwî, kamo ke leweyê to de ewro de pecî 

Lingê to ke ewro de bî gama cîyatê erzena meşte.

Şarê ke dinya de cuwîyenê rastîya xo ser wuştê ra payanê xo ser. Kes linganê zobîna kesî ser nêeşkeno rawurzo payî. No payra vindertiş tenya serê lingan de vindertiş nîyo; felsefe, kultur, sîyaset û ziwan o. Însan ke virende dest pê dide linganê xo ser vindertişî kerd, î însanî rê yew linga hîrêyine hewce bîyê. Na linge îdea bîyê. Însan o ke îdeaya xo çîn a, nêeşkeno pay ra findo. Çunkê tebîyatî însan rut û rupal viraşt, bîyayîş ra qe yew çeke bîle însanî nêdaye. Însan dûştê zehmetîya tebîyatî de tenya fikrê xo bî. Însan fikrê xo ra dûştê tebîyatî de serkewte bî. Însan ke wuşt ra payanê xo ser averî dî. Averîdîyayîşî însan de fikrê newî ardî meydan. Însan de heşyareyî bîye hîra û tebîyat goreyê xo dîzayn kerd. Tebîyat goreyê xo dîzaynkerdene fikr ra bena. Her însan fikrîyeno, hênî ke însan hewn de bîle fikrîyeno, la ma nî rê nêeşkenîme vacîmê fikr. Fikr tesîrê aver dîzaynkerdena. Ma fikrê însanî ke averî ser tesîrê ci çîn o, nêvanîme fikr. Çunkê heywanê zobîna kî heşyarê dîyarde ra fikrîyenê. Fikr avêrîberdena însanî, qomî û xo bi xo avêrî ser beno.

Rastîye bêpeynî nîya. Rastîya yew qomî kî, çiqaş î qomî zêde waxt avêrî bena a ya. Rastîya qoman zey rastîya fîzîkî nîya. Qomî her ke avêrî şonê, cuya qoman de kî çîyê newî û fîkrê newî vecîyenê meydan. Çunkê dinyaya ma ya teberî de her çî bedelîyeno. Qom kî dera fikrê newî û kan ra ca bibedelno. Qom ke yew rastîye de ziq bî mend, avêrî nêşono, peynîye de maneno. Çunkê fikro kan cayê xo yê endî ewroyênî de çîn beno, fikrê vîzerî semedê ewroyî hetkar nêbeno.

Şarê ma yê kurdî 1980î ra nat rastîya xo ser sîyaset kerd û naye ser hereketo sîyasî yê xo kerd gird. Nê çewres serran de, se serre ra zêde avêr şî. Çunkê hereketê kurdan zey çepê tirkan fikrê xo se de se îtxal nêkerd. Helbet sîyasetê dinya kî temaşe kerd. Uca ra kî goreyê xo çî gurewt, labelê her çî ra verî şarê xo zaf baş texlîl kerd û sîyasetê xo rastîya şarê kurdî ser awan kerd. Çiqaş ke lingê xo sîyasetê dinya de bîyî, kokê xo ardê Kurdistanî de bî. Labelê nê weçînayîşê peyênî de sîyasetê ma yo legal rastîya şarê ma ra dûrî şî û zaf alojîye vete meydan. Rexneyê şarî goş nêda û rastîye rê çimê xo cadayî. Xeleta yewine namzedê serokkomarîye nêvet. Eke namzedê serokkomarîye yê xo bivetêne, gerê dideyin de destê ci bibîyêne qewetin û bieşkayêne bazarîyê bikero. Dideyine namzedê wekîlîye zafêrî rastî nêbîyî, kurdan ra zêde tirkî bîyî. Şar çiqaş ke demokrat beno bibo, yew hete ra kî hîs ra hereket keno, ganî ma nî çiman ver pêcîmê. Ma se kenîme bikerîme şar ma dima êno, no fikro rast nîyo. Wekîlanê HDPyî  midafakerdişê xeletanê nî namzedanê wekîlanê tirkan ra, heqa şarê ma seveknayîş rê waxt nêdî. Helbet ma demokrasî semedê her kesî wazenîme, la ma hîna tîja demokrasî xo ser nêakerda zobîna kesî rê senên demokrasî danîme. No pêro dinya de nêbedelîyeno. Eke hewce ra zêde çî ke da yew mordemî, no ne dostî ya ne rastî ya ne kî demokrasî yo. Ganî çiqaş hewce wo hande bidê. Felsefe de nîspeto zernên esto. Camêrdîye hewce ra zêde dayîş nîya, bexilîye ke nîya, camêrdîye çîqaş hewce wo hande dayen a. Eke yew kesî rê yew astore hewce wa yew astore bidê, to ke dide astorî dayî na camêrdîye nîya. Na hem to rê hem kî keso ke to dide astorî dayî rê xirab a. Ez bawer kon sîyasetê ma yo legal serê naye de hesabê xo baş keno û waxt o ke verê ma de zagonê xo serê rastîya şarî ser ronano keno çîp, kes naye ra quman mekero. Pîya bîyayena ma her waxt zerê dismenî de xof û ters a.