Tepişteyo 30 serre Ramazan Algan Zîndanê Tîpê Tyî yê Dîyarbekirî ra ame tehlîyekerdene.
Ramazan Algano ke 1993 de hetê Mehkemeya Asayîşî ya Dewlete (DGM) ra bi îdîaya ”Xeripnayîşê yewîya dewlete” ame tepiştene badê 30 serran Zîndanê Tîpê Tyî yê Dîyarbekirî ra ame tehlîyekerdene.
Keyeyê Alganî ke qezaya Silopîya ya Şirnexî ra ame, pîya bi îdarekaranê TUHAY-DER, MED TUHAD FEDî, Hemşaredarê Silopîya Suleyman Şavluk û Hemşedarê Bismilî Orhan Ayazî yo ke herinda ci de qeyûm ame tayînkerdene, şîyî vera Ramazan Alganî.
Alganî vejîyayîşê zîndanî de bale ante xoverdayîşê tepişteyan ser û waştişê haştîye ard ziwan.
