Aktîvîstanê TJA Stenbol de veradîyayîşê 3 tecawuzkeran bi pankarta ‘Çeteyanê tecawuzkeran mepawe, muhakeme bikere’ şermezar kerd.

Avcilar de cinîyan pankarta ‘Çeteyanê tecawuzkeran mepawe, muhakeme bikere’ akerde û sloganê Jin, Jiyan, Azadî vat. Dadîyan çalakîye de laçîkê xo yê sipîyî zî eştî. Hemvervatoxa DBPyî ya Stenbolî Gulîstan Aydine eşkerayîye wende. Aydine da zanayene ke vera cinîyanê kurdan polîtîkayê şerê taybetî yenê caardene û vat: “Ma nê polîtîkayan serebûtanê Îpek Ere û Gulîstane Doku ra zanenê. Mêrdîn de zî 3 tecawuzkerî vera dîyayî. Dosyayanê hêrişanê cînsîyan û şîdetî de eke faîlî kesê unîformakerdeyî bibê nêtepişîyenê.”

Kartal de îdarekarê HDP û Partîya Çep a Keske, Hemsereka GOÇÎZDERî Kamîle Kandale, endamê ANYAKAY-DER û MATUHAY-DERî û xeylêk kesî zî tewrê eşkerayîye bîyî. Hemvervatoxa DBPyî ya herêma Marmara Dîlber Demîre eşkerayîye wende. Girseyî waşt ke Warê Neyzen Tevfîkî de eşkerayîye bido û rayraşîyayîş bikero la polîsan bi bahaneya qedexeyî nêverda. Cinîyan naye ser o bi sloganê ‘Jin, Jiyan, Azadî’ ver bi bînaya HDPyî ya qeza rayraşîyayîş kerd û tîya de eşkerayîya xo daye.