Tornê Şêx Seîdî Hasan Basrî Firatî ard ziwan ke wa her kes ganî raya xo bido DEM Partî û wina vat: “Seba ke ma cografyaya xo de bi ziwan û kulturê xo biciwîyê, ganî ma weçînayîşanê herêmîyan de ser bikewê.”

Hasan Basrî Firatî pare kerd ke qezayanê Erziromî de vera weçînitoxan operasyonê mezgî yenê kerdene. Firatî da zanayene ke Erzirom de 2014 de bi ruhê neteweyîyî çar şaredarîyî ameybî destvistene û vat: “Dewlete tehamulê ney nêkerd û qeyûmî tayînê şaredarîyanê ma kerdî. Ez ewro surgunî ra venga şarê ma dana ke bi ruhê welatperwerî wa şoro sindoqan ser û şaredarîyanê xo apey bigêrê. Seba ke ma cografyaya xo de bi ziwan û kulturê xo biciwîyê ganî ma weçînayîşanê herêmîyan de ser bikewê. Ma ganî dormeyê partîya xo de bibê yew, kînê xo bidê kiştêke.”

Firatî îfade kerd ke rejîmê Erdoganî polîtîkayanê înkar û îmha de israr keno û vat: ”Şarê ma ganî bi îstîsmarkerdişê dînî yê nê rejîmî nêxapîyo. Mîsyonê Şêx Seîd û embazanê ey ewro mîyanê sîyasetê kurdan de dewam keno. Şarê kurdî binê nameyê wayûbiratîya misilmanan de xapîyeno. Şêx Seîdî seba ke dîn, kultur û ziwanê ma ameybî înkarkerdene têkoşîn kerdbî. Ewro êyê ke seba pawitişê heq û huqûqê şarê kurdî têkoşîn kenê wayîrê mîsyonê Şêx Seîdî vejîyenê. Ganî şarê ma bizano ke namzedê partîyanê dişmenanê kurdan nêbenê teqîbkerê Şêx Seîdî.”

Firatî dîyar kerd ke dewleta tirke bi dîn û neteweperestîye hîsanê şarî îstîsmar kena û vat: ”Îşxalê Efrînî ra dima seba ke sîyasetê xo meşrû bikera dewleta tirke medrese, camî û dezgehê xo yê dînî awan kerdî. Hîzbullahî yan zî HUDA-Parî destek da înan. Nika ê Şêx Seîdî şuxilnenê. Ganî şarê ma nêxapîyo. Ferasetê înan şarê ma temsîl nêkeno. Şêx Seîd û embazanê ey seba şarê ma bedelî dayî, înan dişmenê şarê xo reyde pênêkerd.”