Şarê Çewlîgî çend rojî yo bi tagê #BingölAFETbölgesiilanedilsin (Wa Çewlîg sey herêma afate bêro îlankerdene) gazî keno ke dewleta tirke Çewlîgî sey herêma afate qebul bikera.
Seke yeno zanayene wird xetê fayî Çewlîg de resenê pê. Coka Çewlîg binê rîskê girdî yê erdlerzî de yo. Xora badê erdlerzê Mereşî heme pisporî vanê ke ê mabênê qezaya Kanîreş û Çewlîgî de erdlerz pawenê. Çoka çewlîgijî wazenê ke wa Çewlîg zî sey herêma afate bêro îlankerdene. Rixmo ke Çewlîg sey merkezê erdlerzî yeno zanayene û zaf rey tede erdlerzê girdî qewimîyayî, selahîyetdarê dewleta tirke goş vengdayîşê şarî nêdanê û sey herêma afate îlan nêkenê.
Şarê Çewlîgî wazeno ke banî bêrê kontrolkerdene û tedbîrî bêrê girewtene. Seba ke pisporî semedê erdlerzê Çewlîgî hîşyar kenê, şar qerqilîyeno, terseno binê banenê xo de bimano. Seba ke bêtera ke bajaranê bînan de qewimîyaye wa Çewlîg de mebo, şar veng dano ke wa tedbîrî bêrê girewtene. Coka wazeno ke wa lezabez Çewlîg sey herêma afate bêro îlankerdene. Çend rojî yo çewlîgijî medyaya sanale de gazî kenê, qîrênê ke verê bêterêka bîne bîgêrê. Vengdayîşê çewlîgijan çend şino gird beno.
