Endamê Komîteya Merkezî ya PDKSyî Gêlo Îsayî îfade kerd ke ganî komelê Ewropa mesuldarîya xo bîyaro ca û wina vat: “Ganî şarê Rojawanî komelê mîyanneteweyî de statuyo ke heqê ci yo bivisno destî.”

Endamê Komîteya Merkezî ya Partîya Demokratîke ya Kurdanê Sûrîye (PDKS) Gêlo Îsayî derheqê hêrişanê îşxalî û polîtîkayanê dewleta tirke de ANFyî rê qisey kerd.

Gêlo Îsayî ard ziwan ke destpêkê krîzê Sûrîye û Şorişê Rojawanî ra nata dewleta tirke hêrişê destkewteyanê şarê Rojawanî kena û vat: “Dewleta tirke vera Rojawanî hetêkî ra provokasyon, siyakerdişî kena, erdê ma îşxal kena û şarê ma qetil kena. Dewleta tirke seba ke îşxalêkê neweyî ra zemîn nêdî narey zî hêrişê fermandaranê QSDyî kerd. Nê fermandaran vera DAÎŞî şerêko bêeman kerdbî. Seba ke kurdan pê têkoşînê vera DAÎŞî bala dinya ante xo ser dewleta tirke wazena kurdan çin bikera. Dewleta tirke coka cergan weye kena û herêmanê îşxalkerdeyan de ca dana înan. Dewleta tirke wazena prosesê çareserîya krîzê Sûrîye de kurdî mebê wayîrê hêzî coka herême de kaos vejena, merdiman dana koçkerdene û kena ke Îdareyê Xoserî tasfîye bikera.

Îsayî qiseykerdişê xo rê wina dewam kerd: “Dewleta tirke dişmenê ebedî yê kurdan a. Na dewlete PKK ra verî zî dişmenê kurdan bîye. Koalîsyono Mîyanneteweyî vera hêrişanê dewleta tirke vengê xo nêkeno yanî bi nê hawayî paştî dano nê hêrişan. Şehîdgehê ma pê ewladanê ma yê ke vera DAÎŞî şer kerd û feda kerd, pirr ê. Ganî komelê Ewropa verê nê ewladan de mesuldarîya xo bîyaro ca. Ganî no şarê Rojawanî komelê mîyanneteweyî de statuyo ke heqê ci yo bivisno destî.”