Serkêşîya Meclîsê Şarî yê Sinûnî hêrişê dewleta tirke şermezar kerd û wina veng da: “Şarê Şingalî wa wurzo payan ser û vajo ke Şingalî teslîmê çewî do nêkero.”

Dewleta tirke ya îşxalkere 13ê teşrîna peyêne de bajarekê Sinûnî yê Şingalî de pê droneyê çekdarî wesayîtêk kerdbî hedef û hêriş de di endamê YBŞyî şehîd bîyî.

Meclîsê Şarî yê Sinûnî bi eşkerayîya çapemenîye hêriş protesto kerd. Endama TAJÊ Şême Remo eşkerayîye de qisey kerd û vat: “Dişmenî serrgêra azadkerdişê Şingalî de no hêriş kerd. Şarê Şingalî hêdî hêdî agêreno wareyanê xo. Se beno wa bibo ma do verê dişmenî de çok nêşorê edî ro. Ma do qetî têkoşînê xo ra fek vera nêdê.”

Hemserekê Meclîsê Sinûnî Seydo Alîyî vat: “8 serrî verî Şingal amebî azadkerdene. Şarê ma hînî agêreno Şingalî. Dişmen aramî û asayîşê Şingalî nêwazeno. Şarê Şingalî wa wurzo payan ser û vajo ke Şingalî teslîmê çewî do nêkero û tira nêşoro.”