Sereka Pêroyî ya ÎHDyî Eren Keskîne ifade kerd ke Wezîrê Karanê Zereyî seba ke pêvînayîş nêkero 10 rojî yo cewab nêdano.

Keskîne vist vîrî ke Mayê Şemeyî 1995 ra nata seba ke aqîbetê vînîbîyayeyan eşkera bibê têkoşîn kenê la 2018 ra nata nêeşkenê çalakîya xo bîyarê ca. Keskîne bale ante ser ke rixmê bira AYMyî zî her hewte Meydanê Galatasarayî de Mayê Şemeyî raştê hêrişan û qedexeyî yenê.

Keskîne ard ziwan ke ê zanenê ke bira Qaymeqamîya Beyogluyî şexsî nîya; bira Wezîrîya Karanê Zereyî ya. Keskîne vat: “Ma Wezîrê Karanê Zereyî yê neweyî ra randevuyê pêvînayîşî waşt. Seba ke Mayê Şemeyî raştê qedexe, astengkerdiş û kerdişanê xiraban yenê, ma wazenê pêvînayîş bikerê. La waştişê randevuyî 10 rojî xo pey de verdayî û hema zî cewabêk nêdîya ma.”

Keskîne qala îşkenceyê destbendkerdişî kerde û vat: “Wexto ke ma yenê destbendkerdene nêeşkenê îhtîyacîyanê xo yê bingeyînan zî bîyarê ca. Na çalakîya ke 1995 ra nata est a senî sey ‘tehlukeyine’ yena ercnayene? Mumkîn nîyo ke no bêro famkerdene. Ma ney qebul nêkenê û qetî Meydanê Galatasarayî ra fek vera nêdanê.”