Parlamenterê HDPyî yê Amedî Îmam Taşçierî Heyetê Pêroyî yê Parlamentoyî de pêvînayîşanê butçe de kirdaskî qisey kerd. Serekwekîlê Parlamentoyî Haydar Akarî qiseykerdişê ey asteng kerd. Akar eynî wextî de parlamenterê CHPyî yê Îzmîtî yo.

Kurdofobîya dewleta tirke bêmabên dewam kena. Kamcî partî bena wa biba ferq nêkeno. Hişmendîya nîjadpereste taybetmendîya hempare ya pêro partîyan a. Serekwekîl Akar key ke mîkrofonê Taşçierî qefilneno, vano ke “ziwano fermî yê Tirkîya tirkî yo”. Na cumle seserre ya vera kurdan bi hezaran reyî ameye şuxilnayene. Girmike eynî girmike ya, têna dest bedilîya.

Babî jûye weno

Parlamenterê CHPyî Haydar Akarî birastî keyfê nîjadperestan ard. Tirkî de vanê “babî jûye weno, didanê lajê ci halên benê”. Youtubeyî de binê vîdeoyî de xeylê şîroveyê cîyakerî û nîjadperestî bala merdimî anjenê. Tayê şîroveyî wina yê:

– “Ez kurd a. Welatêkî de ganî yew ziwano fermî bibo. Serekwekîl heqdar o. Ez ziwanê xo zî azad qisey kena.”

– “Tîya Tirkîye ya. Ma tîya dewlete yê.”

– “Serekwekîl ez şima rê zaf sipas kena. Şima xeylê baş îfade kerd.”

-“Serekwekîl heqdar o. Parlamentoyê komara Tirkîya de xerza tirkî ziwano bîn nêno qiseykerdene.”

Vîrê Apê Musayî

Dewleta tirke ronîyayîş ra nata polîtîkaya faşîste rayra bena. Aye birastî serra 1925î ra dima goreyê Planê Şerqî yê Islahatî ziwanê kurdî ser o dest pê tedaya girde kerde. Keso ke kurdî qisey kerdêne, ceza dîyayêne. Na çarçewa de xeylê nimûneyî estê. Apê Musa vîranê xo de nimûneyê winayênî dano: “Dewijan seba rotişî pê here/herî kolîyî ardêne Mêrdîn. Barê înan 50-60 qurişî kerdêne. Eke here/her yan cile baş bibîyêne 5-6 lîra kerdêne. Kurdî key ke here/herî ramnenê, ci rê ‘ço’ vanê. Key ke kurdê ke tirkî nêzanê, her çî ra bêxeber ‘ço’ vanê, leşkerê ke ci rê dafike amade kenê, înan cade bi şîdet û heqaretî destbend kenê. Dewijan key ke bi aqilê xo xo pawitêne, bîlasebeb suc kerdêne. Nînan ra yew zî merdimê maya mi bî. Here/her û barê kolîyanê ci ameyî girewtene û rotene. 5 lîra kerdbî. Oxina ke ci rê cezaya 12 lîra dîyaye. O di rojî ame destbendkerdene û xeylê ame pirodayene.”

Deyîra Nîzamettîn Arîçî

Yew nimûneyo bîn derheqê cuya hunermend Nîzamettîn Arîçî de yo. Arîçî verî TRT de deyîrî vatêne. 15ê nîsana 1979î de bajarê Agirî de ‘roja xelasî’ ame fîrazkerdene. Arîç zî tewrê ci bî. Uca de nêzdî 2 saetî bi tirkî deyîrî vatî. Bado şarê bajarî waşt ke Arîç deyîrêke bi kurdî vajo. Ey waştişê şarî nêşikit û deyîre vate. La bado TRT ra ame vetene û rastê xeylê zextan ame. Netîce de şî teberê welatî.