Hemserekê KCDK-E Engîn Severî eşkera kerd ke pêro kurdistanijî 15ê nîsane de Strasbourg de do bêrê verê CPT û Konseya Ewropa.

Hemserekê KCDK-E Engîn Severî ANFyî rê girîngî û babeta çalakîya 15ê nîsane ser o qisey kerd. Severî da zanayene ke tewr tay 3 hezar kesî do beşdarê çalakîye bibê û vat: “Amadekarîyê ma qedîyayî. Teyna kurdî ney sîyasetmedarî, nuştoxî, roşnvîrî, pawitoxê heqanê merdiman, dostê ma ûsn. zî do tewrê çalakîyê bibê. 

Seke zanîyeno Rayber Apo 25 serrî yo vera sîstemê Îmraliyî xo ver dano. No xoverdayîş hinî vilayê dinya bîyo. Dewleta tirke vera nê xoverdayîşî bin kewte. Tewr peyên weçînayîşanê 31ê adare de rejîmê AKP-MHPyî derbêka girane werde. La dewletê Ewropa wazenê ke hemkarîya xo ya bi dewleta tirke dewam biba.”

Severî vist vîrî ke CPT menga çeleyî de şîbî Tirkîya la Zîndanê Îmraliyî zîyaret nêkerdbî û vat: “Ma do 15ê nîsane de verê ci de bipersê ke gelo CPT kurdan ra çita nimneno, Îmrali de çi qewimîyeno, rewşa Rayber Apoyî senîn a. Teyna a roje ney her roje ma do çalakîyanê winayênan bikerê. Ma do her ca de azadîya Rayber Apoyî biwazê. Ma ruhê Newroze meydanan de eşkera bikerê.

Gamî ma têkilîyanê gemarinan ê hêzanê mîyanneteweyîyan eşkera bikerê, verê polîtîkayanê krîmînalîzekerdişî yê Ewropa bigêrê. Nê esasî ser o ma venga pêro kesan danê ke tewrê çalakîya Strasbourgî bibê.”