Tirkîya û Vakurê Kurdistanî de 81 şaristanan, 973 qezayan û 390 bajarekan de weçînayîşê herêmî virazîya. Weçînayîş de hem şaredarî hem zî 50 hezar muxtar û endamê meclîsanê şaredarîyan musabaqayê weçînayîşî de bîyî. Agirî de îqtîdarê AKP-MHPyî bi otobusan weçînitoxê qeçaxî berdî serê sindoqan û dîmenê kiriştişê weçînitoxanê qeçaxan ameybî antiş. Dîmenan de aseno ke weçînitoxî polîs û leşkeran ra pê yenê. Vîşêrê Agirî xeylê bajar û qezayan de bi dîmen û delîlan ame tespîtkerdiş ke AKPyî Kurdistan de seba serkewtişê xo muracatê xeylê hîleyan kerdo û bi hezaran weçînitoxî neqlê Kurdistanî kerdê.
Kurdistan û Tirkîya de munaqaşayê weçînayîşê herêmîyî hema zî dewam kenê. Çimkî xeylê hîle û kayê AKPyî seba Kurdistanî est bîyî û weçînayîşêk zaf muhîm bî. No weçînayîş seba Kurdistanî manaya tepîya girewtişê îradeyê xo bî û destê qeyûman ra tepîya girewtişê şaredarîyan bî ke di donemo şaredarîyê Kurdistanî bi qerarê îqtîdarî yenê xespkerdiş. AKP sey her wextî kerd ke bi hîleyan ser bikewo. Weçînayîşê herêmî yê 31ê adara 2024î zî wina bî. Neqlkerdişê weçînitoxan ra bigêrêne heta hûmaritişê rayan û xespkerdişê mazbatayan xeylê kayê lêşinî dewre de bîyî.
Kesê ke mazbataya ci nêameye dayîş ra yew zî Hemşaredarê Wanî Abdullah Zeydan bî. YSKyî sere de namzedîya Zeydanî qebûl kerde û destûr da ke weçînayîşê herêmî de Zeydan bi namzedê AKPyî sere de bi heme namzedan reyde bikewo musabaqaya weçînayîşî. Her ca de û Wan de xebatêka hîra ameye rayraberdiş.
Zeydan û Arvas
Wan de namzedanê DEM Partî Abdullah Zeydan û Neslîhan Şedale se ra 55,48 û namzedê AKPyî Abdulahat Arvasî zî se ra 27, 15 raye girewte. Netîceya ke Wan de ameye destfînayîş zî wina bîye. La mercîyo sîyasî reyna rehet nêvindert û her çend ke se ra 55ê rayan DEM Partî bigêro zî îradeyê şarî çinî hesibna û polîtîkaya xespkerdişê îradeyê şarî newe ra Wan vist dewre. Serkewtişê Zeydanî her çend ke eşkera bibo zî, YSKyî mazbata herinda Zeydanî de daye namzedê AKPyî. Badê ke Heyetê Weçînayîşî yê Berzî (YSK) mazbata daye namzedê AKPyî, şarî bi rojan xover da û dikanî nêakerdî. Tena Wan de nê xeylê cayan de seba qerarê YSKyî çalakî ameyê kerdiş û sîyasetmedaran reaksîyonê xo ard ziwan. Xoverdayîşê şarî ser kewt û YSKyî mazbata apey daye Hemşaredarê Wanî Abdullah Zeydanî.
Qerardarîya şarî
Eke xoverdayîşê şarî nêbîyêne, beno ke îqtîdarî reyna xo rê firsend awan kerdêne û na rewşe seba xespkerdişê şaredarîyanê Kurdistanî şixulnayêne. AKP ke dî şar biqerar o, şaredarîyan tepîya nêdano û wayîrê îradeyê xo vejîyeno tepîya game eşte û ferman da YSKyî ke mazbata bidîyo Zeydanî.
Rewşa Amedî
Amed de zî DEM Partî Şaredarîya Bajarê Pîlî û 14 qezayî girewtî. Goreyê netîceya weçînayîşî şaredarîyê Erxenî, Pîran, Gêl, Çinar, Bismil, Farqîn, Licê, Pasûr û Hêne bîyî yê DEM Partî. Heme qezayanê merkezî Peyas, Bajaro Newî, Sûr û Rezan de zî namzedê DEM Partî ser kewtî. Rixmê heme hîle û kayan DEM Partî şaredarîyê 3 bajaranê pîlan, 7 bajaran, 58 qezayan û 7 bajarekan girewtî.
Elbet sey heme bajarê Kurdistanî Amed de zî kayê cidî dewre de bîyî. AKPyî çar dewanê qezaya Çinarî ya Amedî de hezar û 200 rayî bi 2 mîlyon lîra hêrînayî. Mabenê şar û kaybazanê AKPyî de peymana herînayîşê rayan ameye îmzakerdiş. Peymane kewte destê çapemenî û ameye weşanayîş.
Herînayîşê rayan
Dewanê Xaliviran, Darê, Dugruk û Kurgunî de AKPyî muxtaran reyde kontrat viraşt ke weçînayîşan ra pey, seba rayan do 2 mîlyon lîra bidîyo înan. Eno zî kayê herînayîşê rayan bî. Yanî nê weçînayîşî de her tewir kay Kurdistan de dewre de bî, la reyna zî şarî zafane vat ke DEM Partî îradeyê ma yo û temsîlîyetê xo şirawit şaredarîyan.
