Hemserekê HEDEPî Tuncer Bakirhanî kombîyayîşê verênî yê Meclîsê Partîye de ard ziwan ke HEDEP do weçînayîşanê herêmî de Kurdistan de xeylêk şaredarîyan bivisno dest û wina vat: “Ma do şaredarîyanê Kanîreşî, Mûş û Qereçobanî zî tede xeylêk şaredarîyan bigêrê û nê şaredarîyan bikerê keyeyê xizmetî. Ma do serkewtişê xo pêro Tirkîya rê zî vila bikerê.”

Hemserekê HEDEPî Tuncer Bakirhanî kombîyayîş de qisey kerd. Bakirhanî wina vat:

“Ma kongreya xo bi şîarê ‘Seba Azadîye Newe Ra’ kerde ke no şîar xerîtaya ma eşkera keno. Rojawanî ra heta Filîstîn û Qerebaxî dramê merdimatîye qewimîyenê. Ferasetê netewe-dewlete keno ke bi şerî cîyatîyanê ma çin bikero. Rayaumûmîya mîyanneteweyî ya ke verê hêrişanê serê Rojawanî de bêveng a, heman tewirê verê Filîstînî de zî mojnena. AKPyî 3 rojan şîn îlan kerd la no çare nîyo. Filîstîn de qirkerdiş est o. Ganî ma vera nê qirkerdişî vengê xo berz bikerê. Ganî seba Rojawanî zî bi heman hewayî ma vengê xo vejê. Rojawan de domanî yenê qetilkerdene, warê sivîlan dîyenê bombayan ver. Qesre pê pereyê şarî şer kena. Ma do vera nê sîstemî vejîyê. 

Prosesê verê ma de ganî ma mesuldarîyanê xo bi xurtî bikerê. Ma do rêxistinîyanê qeza û şaristanan ê zixmêran awan bikerê, newe ra xo rêxistin bikerê. Ma do şorê her keye û taxe. Weçînayîşê herêmî nika her wextî ra zêdeyêr girîng ê. Kurdistan de ma do reyna xeylêk şaredarîyan bivisnê destî. Ma do şaredarîyanê Kanîreşî, Mûş û Qereçobanî zî tede xeylêk şaredarîyan bigêrê û nê şaredarîyan bikerê keyeyê xizmetî. Ma do serkewtişê xo pêro Tirkîya rê zî vila bikerê.

Ma bi rexnekerdişê weçînayîşanê gulane ameyî nê rojan. Ma do weçînayîşanê herêmîyan de ser bikewê û bi nê hawayî sozo ke dabî şarê xo bîyarê ca.”