Baroya Wanê Buroya Şêwirmendiyê ya Navenda Mafên Jinan vekir. Hevseroka Partiya Wekhevî û Demokrasiyê ya Gelan (DEM Partî) ya Wanê Gulşen Kurt, Namzeta Hevşaredariyê ya Bajarê Mezin a DEM Partiyê Neslîhan Şedal, Serokê Baroyê Sînan Ozaras û gelek endamên baroyê yên parêzer û saziyên sivîl beşdarî vekirina buroyê bûn. Merasîma vekirinê li ber Edliyeya Wanê pêk hat. Parêzeran beriya vekirinê li ber edliyeyê daxuyanî dan û dirûşma “Jin, jiyan, azadî” berz kirin. Endama Navenda Mafên Jinan a Baroya Wanê Mariye Dogruci Borazan daxuyanî xwend. Mariye bal kişand ser 8’ê Adarê Roja Jinan a Cîhanê û got: “Em girîngiyê didin vê roja ku ya me ye, em li dijî binpêkirinên mafên jinan ên li herêma ku lê dijîn û li tevahiya cîhanê, bibin yek û têkoşîna xwe bilind bikin…”
Parêzeran piştî daxuyaniyê li edliyeyê Navenda Mafên Jinan vekirin. Endama Navenda Mafên Jinan a Baroya Wanê Parêzer Rabîa Ozgokçe beriya vekirinê axaftinek kurt kir û spasiya hemû kesên ku bi wan re bûn re spas kir. Rabîa da zanîn ku ji sala 2011’an û vir ve desteka hiqûqî didin hemû jinên tundî li wan hatiye kirin.
