Maya Haştîye Afîfe Kartale îfade kerd ke ganî Serekê PKKyî Abdullah Ocalan bêro veradayene û wina vat: “Ganî her çî ra ver berê Îmraliyî bêrê akerdene ke azadîye bêra. Heta ke tecrîd nêqedîyo ciwan û erdê ma azad nêbê.”

Afîfe Kartal 1969 de dewa Alîya ya qezaya Farqînî ya Amedî de dadîya xo ra bena. Afîfe wexto ke dewe de bîye zewijîyena. A sey dadîyanê kurdan ê bînan bena şahîda teda û zorbazîya dewlete. 1992 de dewa ci yena vêşnayene û keyeyê ci koçê Rezanê Amedî keno.

Dayîke Afîfe vat: “Êyê ke dewe de mendê cerdewanîye qebul kerde. Seba ke ma qebul nêkerd koç kerd. Ma binê barbarîya dewlete de ciwîyenê. Kênaya mi hema dibistane de bîya hedefê dewlete. Çend reyî a ameye destbendkerdene û 2012 de tedayan ra verê xo da koyan. 2017 de kênaya mi vera merkezê polîsan hêrişê xokiştişî kerd û şehîd bîye. 2018 de lajê mi îfadeyê îtîrafkerêkî ser o tepişîya û ci rê cezaya zîndanî ya 18 serran dîyaye.

Kurdistan de her keye de şehîdî û tepişteyî est ê. Seba ke ez azadîya şar û domananê ma wazena, tewra Meclîsê Mayanê Aştîye bîya. Merdimê wayîrwijdanî ganî vera nê kerdişanê dewlete bêveng nêmanê. Ganî her çî ra ver berê Îmraliyî bêrê akerdene ke azadîye bêra. Heta ke tecrîd nêqedîyo ciwan û erdê ma azad nêbê. 100 rojan ra zêdeyêr o tepişteyî Grevê Vêşanîye de yê, dadîyî Nobeta Edaletî de yê. Çira? Seba ke tecrîd biqedîyo. La kes ma muxatab nêkeno.”

Dayîke Afîfe vist vîrî ke verê înan de 8ê Adare Roja Cinîyan est a û vat: “21ê Adare Newroz a û 31ê adare weçînayîşî est ê. Ma do pêroyê nê rojan de vejîyê waran. Wa pêro cinîyî 8ê Adare de meydanan de bê. Ez venga pêro şarê tirkî û kurdî dana ke bêrê 31ê adare de ma nê ferasetê faşîstî bikerê binê sindoqan û nê zulmî biqedînê. Ma aştîye wazenê.”