Yew civak de eke rojnamegeran ser o zext bibo, verni roca ê civakê bînî tahluke de yê. Ewro Tirkiya û vakurê Kurdistanî de vereroca civakê tarixa dewleta tirke de heya enka xeteriya eno hewayê hama nêdiyo.
8ê Hezîrana 2022î de 22 hebî kedkarê çapemanîye azade Serdar Altan, Mehmet Alî Ertaş, Safîye Alagaş, Gulşen Koçuk, Azîz Oruç, Omer Çelîk, Suat Doguhan, Ramazan Gecîken, Esmer Tunç, Neşe Toprak, Zeynel Abîdîn Bulut, Mazlum Dogan Guler, Mehmet Şahîn, Elîf Unger, Îbrahîm Koyuncu, Remzîye Temel, Mehmet Yalçin, Abdurrahman Oncu, Lezgîn Akdenîz, Kadîr Bayram, Feynaz Koçuk û Îhsan Guler Amed de ameyî binçim kerdene. 8 rojî binçimkerdişî ra pey 16 rojnamegerî ameyî tepiştene.
Eno êriş rojnemegeranê kurdan ser o ne yewin o û ana aseno ke ne zî peynîyin bo. Enê wextî de megna enê êrişan çi yo û kamcî mesajê enê erîşan semedê civakî esto. Ez bawer kena bersiva ena perse semedê veraroca ma zaf muhîm a.
Serverê dewleta tirke Recep Tayîp Erdogan enê vîst serrî yo bi îqtîdarê xo de ke şarî veşneno. Ne heta hew û huqûqî de yew çî welatî rê verdayo, ne heta aborîye de ne zî yew hêvî semedê şaran verdayo. Bi enê atmosferî reydi Erdogan mecbûr mendo ki yew weçînitiş bivirazo. Eke xu rê yew serfîrazîya zuraye peyda bikero ewro weçînitişan virazeno. Labelê heya enka zî Erdoganî yew serfîrazî peyda nêkerdo coka roje bi roje zilmê xu vêşî keno.
Ma yew bi yew hewildanê Erdoganî yê peynîyan benê. Erdoganî par aşma sibate de yew êriş ser Garê de viraşt û enê êrişî de ser nêkewt heya xeylê eskerê cî zî ameyî kiştene. Tira pey aşma gulane de dest pê dagirkerdena Metîna, Avaşîn û Zapî kerd reyna ser nêkewt. Kinarê bînî ra êrişê xu ser HDPyî de vêşî kerd û heta enka wazeno HDP pado. Emsar 17ê aşma nîsane de newe ra êrişanê xu en rey herêma Zaptî dest pêkerd. Şima beno ku enka bipersê û wajê eno êrişê eskerî û tepiştişê rojnamegeran reydi çi eleqe esto? Eleqe zaf o!
Roja ke enê êrişî dest pêkerdî ne çapemenîya Erdoganî ne zî Erdoganî bi xu enê êrişanê peyênan de qala wendayanê xu nêkerdî. Heya ke çapemenîya azade nê eskeranê ke ameyî kiştene û ameyî birîndarkerdene eşkera kerdî a roje ra heya ena roje çapemenîya azade bîye hedefê Erdoganî. Erdoganî seyr kerd nêkerd niştana enê şerê Zaptî serbikewo û ser o zî zurê ci bi rayîrê çapemenîya azade reydi vejîyayî orte, êrişê xu vêşî kerdî. Eke bi yew qale reydi bivajî; Erdogan verva gerîlayan şerê Zapî vînî keno hêrsê xu zî çapemenîya azade ra vejeno.
A diyin zî reyna bi weçînitişî reydi eleqedar o. Erdogan heya weçînitişan nêwazeno yew vejîyo ser rayîrê ci ser. Cinî ci rê asteng bîyî cinîyan ser o zext viraşt. HDP vernîya ci de vindeno HDP ser o her roje zext virazeno. HDK semedê ci pirsgirek bî, ser HDK de zî zext û zilmê xu berdewam keno. Erdogan çand zextî bikero, çand zilmî bikero yew vejîyeno orte; eno zirê ci, dizdîya ci pêro vejîyena orte… Erdogan nêçar mendo, bi ena nêçarîya xu êrişanê xu vêşî keno, bi ena nêçarîya xu zextê xu ser çapemenîya azade vêşî keno..
La kay Erdoganî xu vîr ra kerdo, çapemenîya azade şagirtê Apê Musayan, Gurbetelî Ersozan û Cengîz Altunayan a. În verva zilmî çok nêda erdan, şagirtê ci qet çok nêdanê erdî… Heya çapemenîya azade biba, bizanê ke zilm û zilmkarî niştana vernîya xu bivîno.
