Avûkat Cemal Demîrî dîyar kerd ke ganî tecrîdê vera Rayberê Şarê Kurdî Abdullah Ocalanî wedarîyo û wina vat: “Komel qerqilîyeno û zerrîteng bîyo. Komel wazeno cade Birêz Ocalanî ra xeberêke bigêro.”

Rayberê Şarê Kurdî Abdullah Ocalanî ra 22 mengî yo xebere nêna girewtene. Avûkat Cemal Demîrî ANFyî rê tecrîdê Îmraliyî ercna.

Demîrî pare kerd ke goreyê raporanê CPTyî hukmatê tirkî qetî vera tecrîdî gamêka pozîtîfe nêeşta. Demîrî vat: “Seke zanîyeno adara 2020î ra nata Birêz Ocalanî ra agahîyêke zî nêna girewtene. Zîyaretê Îmraliyî yê CPTyî ra dima rewşêka nedîyare qewimîyaye. Cigêrayîşê tecrîdî erkê CPTyî yo verên o. Ganî CPT derheqê girawe de dest pê cigêrayîşî bikero û netîceyanê ney pare bikero. Hewce nêkeno ke CPT destûrê dewleta tirke zî biwazo. Çunke na rewşe rewşêka îstîsnayî ya.”

Avûkat Cemal Demîrî bale ante qesawetanê şarî ser û vat: “Birêz Ocalan kesêko normal nîyo. Coka qesawet û alozîyî vejîyayê asta tewr berze. Komel qerqilîyeno û zerrîteng bîyo. Komel wazeno cade Birêz Ocalanî ra xeberêke bigêro. Qedînayîşê tecrîdî hem sîyasetê zereyî de hem zî Rojhelatê Mîyanênî de do bibo dewrêkê dîyarkerî. Coka ganî tecrîd cade bêro wedaritene.”