Cenazaya Denîz Poyraze pê merasîmêko bi hezaran kesî tewrê ci bîyî ameye definkerdene. Semedê Denîz Poyraza ke hêrişê vera HDPyî de ameye qetilkerdene Camîya Kadifekale de merasîmêk ame kerdene. Merdimê Denîze û partîyîjî semedê girewtişê cenazaya Poyraze şîyî Mudirîya Goristanan ya Konakî. Gama ke wecîbeyê dînî ameyî caardene merdimanê Poyraze serê tabûtê ci de lawikî vatî.

Dayîka Denîz Poyraze serê tabûtê kênaya xo de dej û hersê xo ard ziwan û vat: ”Hûma dejê zerrîya mi debîfîno zerrîya dayîka kiştoxî zî. Denîze nêmirenî, Denîzêke şiye do bi hezaran Denîze bêrê. Ez pê sere berz a ke ez dayîka aye ya.”

Dima ra cinîyan pê tîlîlîyan û çepikan cenazaya Poyraze na xo doşe û berde keyeyê ci. Dekewtişê taxe de bi seyan kesan cenaza bi slogananê Şehîdî nêmirenî verwazî kerde.  Şaro ke verê berê Denîz Poyraze de ameyê peyser sloganê ”Denîze nêmirenî eştî. ”Bado zî ver bi cayê merasîmî rayraşîyayîş ame kerdene.

Hemserekê Pêroyî yê Partîya Demokratîke ya Şaran (HDP) Pervîn Buldan û Mîthat Sancar  û partîjê zî semedê merasîmî ameyî Camîya Kadifekale.

Hemserekê Pêroyî yê HDPyî Mîthat Sancarî keyeyê Poyraze, partîyijan û şarê kurdî rê bi kurdkî serweşîye waşte û vat: Δqtîdaro ke dişmenê kurdan, demokrasî û azadîye yo,berpirsîyarê nê hêrişî yo. Seba ke vengê hêzanê demokrasîyî bibirnê verî hêrişê kurdan û HDPyî kenê. Denîze Poyraz sembolanê têkoşînê ma ra yew bî. Ma soz danê ke ma do waştişê Denîze bîyare ca. Rixmê heme hêrişan ma do miheqeq ser bikewê.”

Hemsereka Pêroyî ya HDPyî Pervîn Buldane zî serweşîye waşte û vat: ”Dejê ma pîl o. Ma embazêka xo ya ciwane bêpeynîye rê kenê raşt. Ma sey cinîyan ê ke mîrasê hemraya xo ya Denîze dewr girwt, reyna soz danê ke  ma do wayîrê nê mîrasî bivejîyê. No qirkerdiş plankerde ame kerdene. Peyê ci de hêzî estê. Xora fotograf û mesajanê ci ra ma zanê nê kam ê.

Ciwanê ma yê ke yew twît erzenê, embazê ma yê ke eşkerayîya çapemenîye danê,parlamenterê ma û sîyasetmedarê ke tim yenê destbenkerdene bi rojan nezaret yene tepiştene û cipêrsayîş kenê ke tekîlîyanê înan vejê werte. La kiştoxê ke qirkerdişo plankerde kerdo lazabez ame tepiştene ke serê serebûtî bêro girewtene. Wa qet çew mevajê provokasyon o.  No hêrişê vera HDP û kurdan o. Qirkerdiş o. Ma zanê ke zîhnîyetê ke dewaya qefilnayîşê HDPyî akerde û zîhnîyetê ke qirkerdiş kerd eynî yo. Bedelê ci beno wa bibo ma do demokrasî, azadîye û edaletî bîyarê nê welatî. Ma sozê nayî reyna danê Denîza sînayeye. Sereyê şarê ma wa weş bo.”

Badê merasîmî cenazaya Denîz Poyraze bi sloganan ameye berdene Goristanê Kaynaklarî yê Buca. Bi hezaran kesî pê dovîzanê ”Ma pêro Denîze ê”,  pêro HDPyij ê” û pê slogananê ”HDP şar o şar tîya de yo”, ”Kurdîstan do gorê faşîzm bo”, ”Dewleta qetilkar do hesab bido” û ,”Biciwîyo Raybe Apo” rixmê  astengkerdişê polîsan rayra şîyî.

Rayraşîyîşo Kadifekale ra ver bi Buca ame kerdene cinîyan ci rê serkêşîye kerde û hemwelatîyan keyeyanê xo ra pê çepik û nîşanê serkewtişî paştî daye ci. Bi hezaran kesî bi obobusanê ke Şaredarîya Bajarê Pîlî şawitî resayî goristanî.

Goristanê Kaynaklarî pê  bi hezaran leşker û polîsan û wesayîtanê zirxinan gerîyaye binê ablûqa. Cinîyanê ke bi flamayanê moran tabût kirişt heta gorê ci pê sloganan rayra şîyî. Cinîyan vilîkî tabût ser o nayî ro û deyîra “Sê jinên azad” ya Delîla vate.

Birayê Poyreze Suleyman Poyrazo ke Zîndanê Şakranî de û Îbrahîm Poyrazo ke Zîndanê Odemîş de tepişteyê tewrê merasîmî bîyî. Seba ka sixletî estbî xeylê wext destûr nêdîya birayî debikewê goristanî. Birayan Poyrazan waya xo rê xatir waşt dima ra dayîke û waya xo ya bîne de biney qisey kerd. Birayê Denîz Poyraze Kamuran Poyrazo ke Zînanê Kepsutî de destûr nêdîya ke tewrê merasîmê cenaza bibo.

Denîz Poyraze bi sloganan û tîlîlîyan ameye definkerdene. ÎZMÎR