Serekê Odaya Muhendisenê Înşaatî ya Wanî (ÎMO) Firat Durmazî ard ziwan ke Wan de tedbîrê erdlerzî nênê girewtene û wina vat: “No zî mojneno ke Wan semedê erdlerzê neweyî amade nîyo. Aştîya îmarî zî nê rîskî girdêr kena.”

Durmazî wina qisey kerd: “Erdlerzanê 2011î yê Wanî de nizdê hezar kesan dinyaya xo bedilnaye. Nê erdlerzî ra qet dersêk nêameyî girewtene. Tewr peynî erdlerzê Elbakî de dewanê sînorî de 30 kesan dinyaya xo bedilnaye. 11 hezar bînayanê ke erdlerzê 2011î de xesaro pîl dî, badê cû şuxulîyayî û hema zî nêrijîyayî. No zî mojneno ke Wan semedê erdlerzê neweyî amade nîyo. Aştîya îmarî zî nê rîskî girdêr kena.  Eke erdlerzêk bibo, no semedê ma tehlukeyo gird o. Xora îxmalkerdiş erdlerzan açarneno bêtere. Gerek vera erdlerzî tedbîrî bêrê girewtene. Eke her kes eşkeno bibo mutahîd, bêzehmet eşkeno belgeyê mutahîdîye bîgêro, o wext badê rijîyayîşê bîna û mergî çew nêeşkeno mutahîdî sucdar bikero. Gerek selahîyet û mevzûatê mutahîdîye miheqeq bibedilîyo.”