Kurdistanî û dostên wan li ser banga Tevgera Jinên Kurd a Ewropayê ji bo azadiya fîzîkî ya Rêberê PKK’ê Abdullah Ocalan li 12 navendên Elmanyayê meş lidarxistin. Gel li 10 bajarên welatên din ên Ewropa û Awûstralyayê jî daketin qadan, bertek nîşanî bêdengiya hêzên navneteweyî ya li ber êrîşên dewleta tirk ên di rojên dawî de zêde bûne xwestin tavile bikevin nava lîv û tevgerê.

Dûîsbûrg

Komploya navdewletî ya li dijî Rêberê PKK’ê Abdullah Ocalan ku beriya 26 salan pêk hat û weke Komploya 9’ê Cotmehê ket dîrokê, li bajarê Dûîsbûrg ê Elmanyayê bi mîtîng û meşekê hate proestokirin. Bi sedan Kurdistanî û dostên wan ku li ser banga TJK-E’yê li Dûîsbûrgê li hev civiyan, ji bo bîranîna şehîdên şoreşa Kurdistanê deqeyek rêz girtin.

Di mîtîngê de li ser navê TJK-E’yê Ayten Kaplan, Hevseroka KON-MED’ê Ruken Akça, li ser navê KOMAW’ê Fatma Ozer, li ser navê PYD’ê Zozan Dêrik û li ser navê MLKP’ê Şafak Denîz axivîn. Di axaftinan de komploya 9’ê Cotmehê hat protestokirin û êrîşên îmhayê yên dewleta tirk ên bi ser Bakur û Rojhilatê Sûriyeyê hatin şermezarkirin. Girse piştî axaftinan dest bi meşê kir. Di axaftinên mîtîng û meşê de hat gotin ku Rêberê Gelê Kurd Abdullah Ocalan ji bo pûçkirina komploya 9’ê Cotmehê li Îmraliyê berxwedaneke asta herî jor nîşan daye û bi projeyên ku di dîlgirtina xwe ya 25 salan de derxistiye pêş ji bo gelê Kurd û Rojhilata Navîn bûye hêviyeke mezin. Di axaftinan de êrîşên dagirkeriyê yên dewleta Tirk hatin şermezarkirin û diyarkirin ku di êrîşên sê roj in didomin de gelek santralên elektrîkê, navedên trafoyan, nexweşxane, kargeh û cih û warên jiyanê hatine bombekirin û zêdeyî 10 sivîl jiyana xwe ji dest dane.

Girseya ku nêzî 3 kîlometreyan meşiya gelek caran dirûşmeyên “Bijî Serok Apo”, “Ji Ocalan re Azadî”, “Kujer Erdogan”, “Her der Rojava, her der Kurdistan” û “Artêşa Tirk a dagirker ji Kurdistanê bicehime”  berzkirin.

Darmstadt

Di vê çarçoveyê de bi sedan Kurdistanî li Darmstadtê meşiyan. Kurdistaniyên li Gîessen, Russelsheîm, Frankfûrt, Hanaû, Mannheîm û Offenbanchê dijîn beşdarî meşê bûn. Çalakgerên li Darmstadt Lûîsenplatzê li hev civiyan, ber bi kolana herî qelebalix a bajêr ve çûn û li navenda bajarê Darmstadtê bi mîtîngekê dawî li çalakiya xwe anîn.

Amsterdam

Li bajarê Amsterdam ê Hollandayê bi pêşengiya Tevgera Jinên Kurd meş û mîtîngek hat lidarxistin. Di meşê de posterên Rêberê Gelê Kurd Abdullah Ocalan hatin hildan û danezanên ku komployê vedibêje hatin belavkirin. Di axaftinên çalakiyê de bal kişandin ser dîlgirtina 25 salan û tecrîdê û daxwaza azadiya Rêberê Gelê Kurd Abdullah Ocalan hat kirin.

Rennes

Êrîşên dewleta tirk ên bi ser Rojava li bajarê Rennes ê Fransayê bi meşeke hatin protestokirin. Kurdistanî û dostên wan ku li qada Place Colombîerê li hev civiyan û heta qada Rebuplîcê belavokên bi zimanê Fransî belav kirin. Bertek nîşanî bêdengiya hêzên navneteweyî ya li ber êrîşên dagirkeriyê yên dewleta Tirk a dagirker ku di rojên dawî de zêde bûne, dan û xwestin tavile bikevin nava lîv û tevgerê.

Sydney

Di çalakiya protestoyî ya li bajarê Sydney ê Awûstralya de êrîşên dewleta tirk ên bi ser Rojava hatin şermezarkirin. Çalakî ji aliyê Navenda Civaka Kurd a Demokratîk ve li Town Hallê hat lidarxistin û bang li raya giştî ya navneteweyî hat kirin ku li dijî êrîşên qirkirinê yên dewleta Tirk tavile bikevin nava lîv û tevgerê. Di daxuyaniya Federasyona Civaka Kurd a Demokratîk a Awûstralyayê de hat destnîşankirin ku dewleta Tirk bi êrîşên bi ser Rojava dixwaze hemû destkeftiyên gelê Kurd tasfiye bike û got ku divê hemû mirovahiya pêşverû li hemberî van êrîşên qirkirinê xwedî helwest bin. Çalakî bi dirûşmeyên “Bijî Serok Apo”, “Bijî berxwedana Rojava”, “Terorîst Erdogan” û “Terorîst Tirkiye” bi dawî bû. Heman rojê gelek parlementerên Partiya Keskan a Awûstralyayê û Partiya Karkeran li Navenda Civaka Kurd a Demokratîk a Sydneyê li hev civiyan. Senatorê Partiya Keskan Davîd Shoebrîdge axaftinek kir. Shoebrîdge êrîşên hewayî yên dewleta Tirk şermezar kir û got ku ew ê van êrîşan bibin Parlementoya Federal.

Hanover

Li bajarê Hannoverê yê Elmanyayê, bi pêşengiya Meclîsa Jinê ya Ronahî, bi armanca şermezarkirina Komploya Navneteweyî ya 9’ê Cotmehê û êrîşên qirkirinê yên dewleta tirk ên ji 5’ê Cotmehê ve li dijî Bakur û Rojhilatê Sûriyeyê, mîtîng û meş hate lidarxistin. Jin, Kurdistanî û dostên wan li Steîntorê li hev civiyan û heta ber Konsolosxaneya tirk meşiyan. Di çalakiyê de hate gotin ku êrîşên qirkirinê ji pergala êşkenceya Îmraliyê nayê qutkirin, hate destnîşankirin ku heta azadiya fîzîkî ya Rêber Apo wê di çarçoveya pêngavê de çalakî bên lidarxistin. Di çalakiya ku bêdengiya navneteweyî ya li hemberî pergala tecrîda girankirî ya li ser Abdullah Ocalan û êrîşên qirkirinê yên li ser gelê kurd li Rojavayê Kurdistanê hate protestokirin. Banga hestiyariyê li raya giştî ya navneteweyî hate kirin. Di çalakiyê de daxuyaniya Tevgera Jinên Kurd a Ewropayê TJK-E ya Elmanyayê jî hate xwendin. Çalakiya ku gelek caran dirûşmên “Bijî Rêber Apo” û “Bijî berxwedana Rojava” hatin berzkirin, banga xwedîderketina qadan hat kirin û dawî li çalakiya xwe anîn.

Kopenhag

Komploya 9’ê Cotmehê û êrîşên qirkirinê yên dewleta tirk ên li ser Rojava, li paytexta Danîmarka Kopenhagê bi mîtîngekê hate protestokirin. Di mîtînga ku li Qada Vesterbro Torvet hat lidarxistin de daxuyaniya bi zimanê Danîmarkî hatibû amadekirin hat xwendin. Di meşê de bênavber dirûşmên, “Ji Rêber Abdullah Ocalan re azadî”, “Ji Kurdistanê re statû” û “Dawî li êrîşên dagirkeriyê yên li Rojava bînin” hatin berzkirin. Di mîtînga ku li dijî dagirkeriyê banga rawestana êrîşan hate kirin. Ji bo çalakiya 10’ê Cotmehê roja Sêşemê saet 13.00’an li ber Parlamentoya Danîmarkayê ji bo azadiya fîzîkî ya Rêberê Gelê Kurd Abdullah Ocalan banga tevlîbûnê hat kirin.

Marsîlya

Li Marsîlyayê bi hezaran kes ji bo azadiya fîzîkî ya Rêberê PKK’ê Abdullah Ocalan meşiyan û êrîşên tunekirinê yên dewleta Tirk protesto kirin. Li ser banga Tevgera Jinên Kurd a Ewropayê Kurdistaniyên ji Dragûîgnan, Marîgnan û Montpellîsê bi pêşengiya Meclîsa Jinê ya Arîn Mîrkan li Qada Canabierre li hev civiyan û heta şaredariyê meşiyan. Di meşê de pankartên bi nivîsa “Ji Abdullah Ocalan re azadî” û wêneyên Abdullah Ocalan hatin hilgirtin. Di çalakiya ku Rojava û berxwedana gerîlayan hat silavkirin de dirûşmên “Kujer Erdogan”, “Terorîst Erdogan” û “Terorîst Tirkiye” hatin berzkirin.

Li meydana Vieux Port a li kolana qelebalix a Marsîlyayê 5 deqeyan çalakiya rûniştinê hat lidarxistin. Girseyê bi gotina “Rojava ne bi tenê ye” bang hat kirin ku demildest qada hewayî ya Bakur û Rojhilatê Sûriyeyê ji dewleta Tirk re bê bigirin. Piştî gihiştina ber Şaredariya Marsîlyayê, ji bo Şehîdên Şoreşa Kurdistanê deqeyek rêz hat girtin.

Li ser navê Meclîsê Arîn Mîrkan, Roza Gundogdu daxuyanî xwend. Roza Gündoğdu; “Em ê li qadan bin da ku tecrîda li ser Rêber Apo tavilê bi dawî bibe û azadiya xwe ya fizîkî bi dest bixe. “Em hêzên navneteweyî bi taybetî CTP vedixwînin ku hiqûqa xwe bi cih bînin.” Li ser navê DTM’ê Mahîr Dogan axivî û got, “Ji bilî berxwedanê ti çareya me nemaye. Werin em bi gerîlayên berxwedêr û gelê xwe yê Rojava re bibin yek, Rêberê xwe azad bikin û li Kurdistana azad bicivin.”

Bremen

Kurdistanî û dostên wan li bajarê Bremen ê Elmanyayê, êrîşên dewleta tirk a dagirker ên li ser Rojava û komploya navneteweyî ya 9’ê Cotmehê ya li dijî Rêberê Gelê Kurd Abdullah Ocalan şermezar kirin. Girse li ser banga Meclîsa Civaka Demokratîk a Kurd a Bremenê û Meclîsa Jinê ya Seve li ber Parlamentoya Eyaleta Bremenê li hev civiya û deqeyek rêz girt. Di mîtîngê de aktîvîsta Tevgera Jinên Kurd Xezal Yalçin bal kişand ser girêdana êrîşên dagirkeriyê û komploya navneteweyî. Xezal Yalçin got, “Dîktatorê Erdogan her roj Kurdan bombe dike. Ji ber êrîşên dagirkeriyê yên dewleta Tirk her roj jin û zarok tên qetilkirin. Em jin, gel, kesên ku li kêleka gelên mirovahiyê ne, dibêjin heta ku Abdullah Ocalan azad nebe pirsgirêka Kurd çareser nabe. Ji ber vê yekê her tim zarok tên kuştin, jin tên qetilkirin, demokrat û rojnamevan tên girtin.”

Di daxuyaniya Meclîsa Jinê ya Seve de ku di mîtîngê de bal kişand ser tecrîda li ser Rêberê Gelê Kurd, hate destnîşankirin ku dewleta Tirk bi desteka NATO’yê dixwaze armancên xwe yên emperyal bidomîne. Li dijî hêzên komploger ên navneteweyî hate gotin, “Em taristaniya Têkoşerên me yên Rojê tarî nakin hembêz dikin.”

Axaftinên di mîtîngê de gelek caran bi dirûşmê “Bijî Serok Apo” hat berzkirin û pankartên “Freîheit für Ocalan Statu für Kurdistan”, “Bi Jin Jiyan Azadî û Ber bi Şoreşa Jinê”, “Tecrîd û tecrîd”, “Zeeît für Freiheit” hatin hilgirtin.

Brest

Li bajarê Brest ê Fransayê Kurdistanî û dostên wan ji bo êrîşên dewleta tirk ên li ser Bakur û Rojhilatê Sûriyeyê li Qada Liberte hatin cem hev û nerazîbûn nîşanî bêçalaktiya dewleta Tirk û navneteweyî dan. Di çalakiyê de daxuyaniya KCDK-E hate xwendin. Girseyê gelek caran bi qîrîna dirûşmên “Bijî Serok Apo”, “Bijî berxwedana Rojava”, “Bijî YPG/YPJ” û “Terorîst Erdogan” dewleta tirk şermezar kir.

Kiel

Li bajarê Kîel ê Elmanyayê, Kurdistanî û dostên wan ji bo komploya 9’ê Cotmehê protesto bikin, hatin gel hev û meşiyan. Çalakiya bi pêşengiya Jiyana Jin û Defend Kurdistan li Kîel Hbf bi deqîqeyek rêzgirtinê destpê kir. Di daxuyaniya hate dayîn de wiha hat gotin: “Hêzên desthilatdar ên ku Abdullah Ocalan neçar kirin ku ji Sûriye û Rojhilata Navîn derkeve û di encama komployekê de radestî dewleta Tirk kir, nexwestin ku Rojhilata Navîn aram bibe û van dewletan weke 100 sal berê Kurdistan tunebe tevdigerin. Li gora berjewendîyên xwe Kurdistan li Tirk û Ereb û Farisan parçe kirin. Kurd îro hebûna Kurdistanê derxistine holê û ji bo nasname û axa xwe bedêl didin û heta ku her bihostek axa xwe bi dest bixin dê têkoşîna xwe bidomînin. Abdullah Ocalan ji bo gelên Rojhilata Navîn şansek mezin e. Divê gelên Rojhilata Navîn dest ji senaryoyên komployê berdin û bi Kurdan re têkiliyên cîrantiyê yên aştiyane biparêzin.”

Di daxuyaniyê de hat gotin ku faşîst Erdogan careke din bi neheqî êrîşî Rojava kiriye û ev tişt hatin gotin: “Tişta ku dixwaze bike rewşa dagirkeriyê ye. Em tu carî qebûl nakin û em wek hemû Kurdan li dijî wê radiwestin. Her çiqas heta niha ji Rojava ji Tirkiyeyê re yek çalakî pêk neaniye jî, dewleta Tirk a terorîst her cure bûyeran dike hincet û êrîşî Rojava dike. Li wir gelê herêmê, zarok, alavên mirovahî, jîngehên sivîl û çavkaniyên enerjiyê dikin hedef. Sûcên li dijî mirovahiyê û sûcên şer bi awayekî eşkere tên kirin, lê dewletên emperyalîst ên ku komplo çêkirine û destek kirine hê jî li hemberî kiryarên dewleta Tirk a terorîst tu bertek nîşan nadin.”

Di meşê de timî dirûşmên “Terorîst Tirkiye”, “Bijî Serok Apo” û “Bê Serok jiyan nabe” hatin berzkirin.

Oslo

Êrîşên dewleta Tirk ên li ser Rojava û komploya navneteweyî ya li dijî Rêberê Gelê Kurd Abdullah Ocalan, li paytexta Norwêc Osloyê di salvegera 25’emîn de li gel Kurdistanî û dostên wan ên Norwêcê bi çalakiyan hate protestokirin. Mîtînga ku ji aliyê NCDK-OSLO ve hat organîzekirin, li qada stasyona trenê ya Osloyê pêk hat. Endama Desteya Rêveber a Partiya Kesk û Hawirdorê ya Norwêcê (MDG) Bente Knagerhjelm, Seroka Rêxistina Jinan a Norwêcê Kvinnefronten Catherine Linn Kristiansen, Seroka Giştî Liv Muller Smith. Ji Şaxa Ciwanan a Partiya Sor a Norwêcê (Partiya Rødt) Sivertsen, Hevseroka Platforma Jinên Kurd Sara Baban û Hevseroka NCDK-OSLO Endam Aso axaftin kirin û peyamên xwe anîn ziman. Qisekeran bal kişandin ku komplo di sala 25’an de bi ser neket û wiha got: “Azadiya fîzîkî ya Abdullah Ocalan azadiya Rojhilata Navîn û Kurdistanê ye.” Qisekeran jî bertek nîşanî bêdengiya civaka navneteweyî dan û bal kişandin ser êrîşên îmhayê yên dewleta dagirker Tirk ên li ser Rojava.

Mîtîng bi berzkirina dirûşmên “Ji Abdullah Ocalan re azadî”, “Ji Kurdistanê re azadî”, “Bijî Serok Apo”, “Bijî faşîzm” bi dawî bû.

Skockholm

Li bajarê Stockholmê yê Swêdê bi armanca şermezarkirina komplo, tecrîd û êrîşên dewleta Tirk meşek hat lidarxistin.

Zurîh

Kurdistaniyên li Swîsreyê û dostên wan li bajarê Zurîhê li hev civiyan û komploya 9’ê Cotmehê ya li dijî Rêberê Gelê Kurd Abdullah Ocalan, bi meşekê protesto kirin.

Girseyê ku bi pêşengiya Yêkîtiya Jinên Kurd a Swîsreyê (YJK-S) li Helvetîaplatzê li hev civiyan, komploya 9’ê Cotmehê û êrîşên dewleta Tirk ên ji 5’ê Cotmehê ve li dijî Bakur û Rojhilatê Sûriyeyê didomin, proesto kirin.

Di şexsê kesên li Rojava şehîd bûne de ji bo bîranîna şehîdên Têkoşîna Azadiya Kurdistanê deqeyek rêz hate girtin.

Nûnerê YJK-S’ê Ozen Aytaç, bal kişand ser pêvajoya komploya ku 25 sal berê li dijî Abdullah Ocalan pêk hat û anî ziman ku beravajî planên xiyanetê yên komplogeran têkoşîna ku 25 sal in didome, roj bi roj mezin dibe.

Piştî Aytaç, Endamê Dîwana Hevserokatiya Konseya Kurd a Demokratîk a Swîsreyê (CDK-S) Mehmet Aslan, faşîzma dewleta Tirk û hêzên ku piştgiriya komploya navneteweyî dikin şermezar kir. Aslan diyar kir ku Rojava ji bo parastina hemû nirxên cîhanê têdikoşe û got: “Îro cîhan çavên xwe li ber êrîşên dewleta Tirk û tecrîda li dijî Rêberê Gelê Kurd girtiye.”

Piştî axaftinan peyamên bi deng ên şervanên YPJ’ê ji herêmê, hat guhdarkirin û bi hezaran Kurdistanî û dostên ber bi navenda bajêr ve dest bi meşê kirin.

Kassel

Aktivîstên Kurd û enternasyonalîst ji bo azadiya fîzîkî ya Rêberê Gelê Kurd li bajarê Kassel ê Elmanyayê meşek lidarxistin. Meş ji Halîtplatzê destpê kir û heta Rathausê dewam kir. Meş li navenda Kasselê eleqeyek mezin dît. Aktivîstên Kurd û enternasyonalîst diyar kirin ku azadiya Abdullah Ocalan ji bo çareseriya pirsgirêka Kurd şertê bingehîn e û gotin: “Têkoşîna me ya ji bo azadiya Abdullah Ocalan wê bi biryardarî bidome.”

Meş li gelek cihên navenda bajarê Kasselê piştgirî girt. Axaftinên ji bo azadiya Abdullah Ocalan ya li Rathausê bi coşeke mezin hatin pêşwazîkirin.

Viyana

Kurdistaniyên li Viyanayê dijîn û dostên wan li ber Parlementoya Awûstralyayê ya paytext Viyanayê li hev civiyan. Ji bo bîranîna Şehîdên Şoreşa Kurdistanê deqeyek rêz hat girtin. Li ser navê FEYKOM’ê Rêdar H. axivî û têkîldarî êrîşên îmhayê yên dewleta Tirk ên bi ser Rojava agahî dan û wiha bang li hikûmeta Awûstralyayê kir: “Tirkiye bi êrîşên xwe yên bi ser Bakur û Rojhilatê Sûriyeyê li gorî hiqûqa navneteweyî sûcê şer dike. Li hemberî van êrîşan divê hikûmeta federal demildest mudaxeleyî êrîşan bike.”

Li ser navê FEYKOM’ê Rêdar H. bang li her kesî kir ku van êrîşên dewleta tirk bibêrsiv nehêlin û bi awayekî çalak piştgirî bidin Rojava. Piştî axaftinan, girse ber bi Stephansplatzê ku kolana herî navdar a Viyanayê ye meşiya. Çalakî li gel provokasyonên polîs û faşîstan jî bi dirûşmeyên “Bijî Serok Apo” û “Bijî berxwedana Rojava” bi serkeftî bi dawî bû. Komploya 9’ê Cotmehê wê 14’ê Cotmehê di saet 15:30’an de li Viyana Karlsplatzê (Oper) bi meşeke navendî were şermezarkirin û daxwaza azadiya fîzîkî ya Rêberê Gelê Kurd Abdullah Ocalan bê kirin.

Stûttgart

Komploya 9’ê Cotmehê û êrîşên dagirkeriyê yên dewleta Tirk li bajarê Stûttgart ê Elmayayê bi meşekê girseyî hat protestokirin.

Melboûrne

Li bajarê Melboûrne yê Awûstralyayê ji aliyê NAV-KURD’ê ve li ser Komploya 9’ê Cotmehê panelek hat lidarxistin. Ji Komîsyona Perwerdehiyê ya NAV-KURD’ê Mahmût Kahraman di panelê de têkîldarî êrîşên qirkirinê yên dewleta Tirk agahî dan. Kahraman anî ziman ku ew ê bi pêkanîna azadiya fîzîkî ya Abdullah Ocalan li ber êrîşên îmhakirina Kurdan rabin.

Freîbûrg

Kurdistaniyên li bajarê Freîbûrg e Elmanyayê dijîn û dostên wan li navenda bajêr li hev civiyan û 25’emîn Komploya 9’ê Cotmehê ya li dijî Rêberê Gelê Kurd Abdullah Ocalan bi meşekê protesto kirin.

Berlîn

Li paytexta Elmanya Berlînê bi pêşengiya Meclîsa Jinê ya Dest Dan çalakiyek hat lidarxistin. Nav Berlîn (Meclîsa Kurdistaniyên Azad), TekoJIN, TCŞ, Kolektîfa Ararat, KKP, Dîroknas Nîck Branûs, Parlementerê Eyaleta Dîe Lînkê Ferhat Koçak û enternasyonalîst beşdarî çalakiyê bûn. Di axaftinên çalakiyê de hat gotin ku ew ê heta azadiya fîzîkî ya Rêberê Gelê Kurd Abdullah Ocalan li qadan bin û tecrîda li dijî hiqûqa navneteweyî bişkînin. Tevî barana zêde dirûşmeyên “Bijî Serok Apo”, “Bijî berxwedana Rojava” û “Jin, jiyan, azadî” li qadê deng veda.

Parîs

Li paytexa Fransa Parîsê meşekê biîhtişam hat lidarxistin. Girseya ku komploya 9’ê Cotmehê şermezar kir, daxwaza azadiya fîzîkî ya Rêberê Gelê Kurd kirin û êrîşên qirkirinê yên dewleta Tirk ên li ser gelê Kurd şermezar kirin.